قدري الاسود

الحلقة(56)

الحلقة(56)من القصه الحقيقيه #قدري_الاسود  بقلمي #الكاتبة_شهناز_الخزعلي  #جيمن_جلال

يرضني المصايب ورض بيهن
واشوفنهن قسمتي ورضه بيهن
خشب چنهن يناهي ورضه بيهن
عضامي وتهچت امن افرك بديه 

غادة/مرت على اخر حادثه بينا  سنه كامله
خلال السنه هاي لااني اوصل لبيتها ولاهيه
منعت جهالها من دخول بيتي ورفضو يستقبلون ايلاف وهيه طفله
اعدي تصرفاتها الطفوليه والرعنه
وصارت تستفزني بالكلام الي تشمره من ورا السياج اسمع واسكت
مره شكيت لامي كدام سجى

سجى : والله امي تعبتنا كلنا وصرنا مانعرف نتصرف وياها يعني ماتفكر بوضعي وحالي حتى من انصحها تغلط عليه شااسوي

ردت عليها امي ب..

امي:انتي شعليج يمه مانخذج بذنب امج هيه تريد تخرب على بنتي ومافكرت بيج بس مانسوي مثلها احنا غادة وامج حياتهم خاصه مالج دخل بيهم
بس اذا رحتي هم سولفي وياها وكوليلها عيب من عمتي وعمي اذا سمعو شنو موقفي كدامهم .

بعد فتره اجه عم فضل رجال بركه وخير وكل الناس تمدح بطيبته واخلاقه وحبه بين الناس
صالح فضل على بيت عمه اهل الاء وجابهم لعنده واعتذرو منه
واجه عليه حتى نتصالح اني والاء
اول ماقبلت لان اعرفها ترجع نفس طبعها وهيج اني مرتاحه
لح فضل انو نتصالح وكال عم فضل عمو انتي طيبه وهذا مشهودلج وكل انسان يخطأ واحسبيها اختج الجبيره
استحيت ارده وهو جاي بمشروع خيري قبلت تتصالح الاء وياي بس شرطت على نفسي ماامنلها ابد
جابها السيد واجه هيه واولادها اعتذرت وباستني وقسمت متتكرر ....

تصالحنا بس وجهه الحقيقي مستحيل بعد تخفي عليه لو تكدر تغشني بكلامها المعسول وطريقه دخولها لحياتي
احس فضل فرحان لان تصالحنا ويشوفنا نكعد مرات هيج من باب اسقاط واجب
بداخلي اكول شنو من سر لازمه عليك ومخليتك متمسك بيها وتحت امرها

.......بعد صلحنا بثلاث اشهر  كعدت الصبح فضل ماكو مااجانه انتظرته ماكو اتصلت عليه كال"

فضل: اني بالمستشفى الاء اتخربطت واخذتها

غادةشبيها؟

فضل:مااعرف يمكن حصوة بالمراره

بعد الضهر رجعو من المستشفى بس حالتها تكسر الخاطر الوجهه اصفر والشفه بيضه ومحنيه ضهر
سالت فضل .. شنو كلولكم
الدكتور يكول لازم عمليه لان المراره مليانه حصو واحتمال تنفجر لو تتاذه القناة الصفراء

غادة: اي سووها العمليه

فضل: طلبو على حسابنا بمبلغ مااكدر ادبره

غادة: اشكد يعني ؟؟

فضل:٧٥٠ الف
غادة:وليش محتار عندي تراجيي بيعهن ومحبسي يجيبن اكثر وسوو العمليه