قدري الاسود

الحلقة(50)

الحلقة (50) من القصه الحقيقيه #قدري_الاسود

بقلمي #الكاتبة_شهناز_الخزعلي  #جيمن_جلال

هو القدر.....شنو يضم النا  ....طريقين لو فرح لو حزن

قراراتنا السريعة الها نتائج وخيمة.....حياتي عبارة عن

مجازفة أمي على حبل رفيع ....وجواية بركان من النار

هاي ...حياتي...غادة

غادة/من رجعنا لبيتنا فاتحني فضل بموضوع تقريبا جنت ناسيته او مو على بالي وهو ... 👇
كال"

فضل: اكو ولد يمنا يشتغل بالصحه مطلق ويرد يزوج طلب مني اشوفله على عرفي ...

غادة: اي منين يعني ...

فضل:فكرت بأختج لينا
خطيه شنو بقائها عند اهلج يعني تبقى دوم هيج بدون زواج بعدها زغيره ...

غادة: هذا امرها بيد ابوي ومااعرف يعني هو خوش ولد ...

فضل: والله الي معاشرينه كلها تمدح بيه
بس الي بداخله مايعرفه الا الله

غادة: الله كريم ..

فضل:يعني اذا تقدم لاهلج ينطوه ؟

غادة: والله مااعرف اخابر امي واشوف بس فدوة فضل اسال على الولد وعلى حياته وليش مطلك شنو السبب يعني ؟

فضل: ان شاء الله  خوماتوصيني هم اختي هيه
....
وصدك  شنو هاي ايلاف ترا اغار منها ماخذتج مني

...ضحكت كتله"

غادة: انت بالكلب محد ياخذ مكانك

اول فتره بزواجنا جان السيد دائما يغلط بأسمي ويصيحلي الاء اكثر من مره اعدي واسكت اكول تعويد السانه لان دوم كدامه
بس من تكررت اكثر من اربع مرات وتصادف يكعدني من النوم ويكولي كومي الاء
لا اتخبل وازعل ومااحاجيه
بعد ماتكررت ابد وحتى من يريد يغلط يتأسف ويبرر انو السانه متعود  ....

ورجع الولد اتصل على السيد حتى يأكدله انو ينطوه مره

فضل: السيد خابرتي على  الوالده ..

غادة: لا هسه اخابر

خابرت على امي وسالتها .. كالت"

أمي: والله يمه ماادري اسال ابوج واشوف ..

بعد يومين خابرت امي كالت"

اني: اذا السيد متأكد منه وسال عليه مابيها شي خلي يجي..

بعد ماخابرهم السيد وكللهم سبب طلاكه عركه نسوان بينها وبين جوارينهم وطالعه بدون اذنه وصوتها طالع برا ماقابل عليها متعاركين زعلانه شهرين وماقبلت ترجعله طلكها ..

طلب ابوي يكعد وي الولد ويشوفه ويحجي وياه
رحنا اني والسيد لاهلي قبلهم .. واجه الولد اسمه مختار  مواليد ٧٦ شكله طبيعي يشتغل موضف بالصحه
جاب اخته أميرة  واجه اخته اسمها أميرة  بنيه مطلكه وعدها بنات ثلاثه بس كلش حبابه وتنحط بالكلب عرفناها من خلال الحديث من اجت وي اخوها تخطب
تعرفو اهلي على الولد .. وهذا الشي معروف بكل العوائل وخاصه عدنا الي يخطب يراويك شي ويضمر بداخله شي لمن تعاشره يله تكشف معدنه اصيل لو مغشوش ...