الحلقة(62) من القصه الحقيقيه #قدري_الاسود
بقلمي #الكاتبة_شهناز_الخزعلي #جيمن_جلال
كم أتمنى منك حباً . دفئاً. حناناً. و مشاعراً أتوج بها حبي لك
أراك في كل مكان أردت البحث فيه عن سواك
أنت مصيري و قدري لا أعرف ماذا أسميك
أرجوك أبقى معي و لا ترحل لأنني أريدك و لا أريد أحداً غيرك
غادة/الاء صارت تحاول تخوفني بكل الطرق ... مااعرف غايتها شنو
كم مره بوقت متأخر اسمع صوت الشباك ينضرب لو حركه رجلين بالطرمه مالتي ...
اني وحدي وفضل بالوحده مالته وعندي بس ايلاف .. واعرف حقارة الاء .. اخاف .. اخاف من هواي
اولا اخاف من ابليس الداخلها ..
اخاف تذب تهمه عليه وتكول احد جاي يجي عليها واعرف لو اموت مااكدرلها لان شغلها وي ابليس....
مرة مرتين حجيت لفضل .. بالبدايه ماصدكني
كالي تتوهمين ماكو شي .
مره ساعه بالوحده باليل نايمه وقافله الباب عليه وبنتي بحظني
اندكت الباب الخارجي
فزيت مرعوبه تصنتت ماكو رجعت خليت راسي على المخده
رجع الدك ... خفت شلون !!!!!!ساعه بالوحده وضلمه ؛؛؛
بستان وكله اشجار بليل يخوف شااسوي
اخاف افتح باب الهول واكول منو
واصلا منو يجيني بهيج وقت
عفته .....
اندكت اقوى .. اتصلت على فضل اربع مكالمات وماكو رد ...
تركته والدك مستمر .... اخر شي لبست عباتي وعندي خشبه طويله مربعه نسد بيها الباب اذا هوا عالي
لزمتها وصحت من ورا باب الهول.... منووو
ماكو رد ....
رجعت كلت منوو بالباب هم ماكو عفته ودخلت عرفت هاي اليسوي هيج متقصد يخوفني
نزعت عباتي ولزمت الخشبه وكعدت انطر
بس كلي غضب لااكدر واطلع للباب واشوف منو يسوي هيج ولااكدر اسكت والدك على الباب مستمر
للصبح ماغمضت عيني واح...
س راسي يريد يطك ..وعيوني تحركني
بااذان الفجر غفيت ماادري بروحي .. كعدت الساعه بال٩ الصبح جسمي متكسر وايلاف نايمه يمي
كعدت بس الغضب مالي كلبي .. يعني قصدج تسوين هيج ليش حتى اشرد من البيت
لوتموت باقيه وصابره
محاولاتها مانتهت ولابطلت بالاذيه بلاكلام ولاخوف اليلي
بس يحل ظلام اليل تبدي الاصوات بعد الساعه ١٢ وكأنو عايشه جوة فلم رعب .....
كل مااكول لفضل مايصدكني ويصورله عقلي يتخيل شغلات ...
ومره جان طالع بشغل وخابرهم كللهم راح ابات برا
ونص اليل رجع بس ميعرفون بي موجود عندي
وبس صارت ساعه ١٢ونص صار ضرب على الشباك
فز مرعوب من شفته ابتسمت .كلت اي اسمع بااذنك وشوف بعينك حتى تصدك ...
طلع برا دور مالكه احد بقى اليله كلها كاعد على حيله ماغمضت عيونه
اني لان مطمئنه بوجوده ومطمئنه سمع بأذنه نمت ليلتي مرتاحه وسلمته السهر والتفكير بهاي اليله للصبح
كعد الصبح سالته "
غادة:شبيك ليش مانمت؟
باوعلي بعتب لان عرف سؤالي بي نوع من السخريه لان صارلي شهرين اشكيله من هاي الحاله ممصدك وصارت لان حسبالهم مموجود بالبيت
وربي راد يراويه ومن عرفت بي بايت يمنا تخبلت وسوتلها عركه عساس تغار وشلون يبات يمنا رادت بعركتها تغطي عن الجاي يصير
وفعلا فضل نسى الي صار والتهى بعركته وياها
بالنسبه الي غاسله ايدي وجهه وكفه ..ومنتكله على ربي القوي ...
اغلب الاحداث الي تصيرلي فضل بدوامه يعني وحدي مااعرف هو التوقيت هيج لو هيه تختار اكون وحدي حتى تستفرد بيه
..وبيوم كعدت متأخره لصلاة الفجر وصليتها قضى
خلصت صلاة ولميت سجادتي وايلاف نايمه
سمعت صوت مشي بالطرمه
الفجر ستوه طار ..
فتحت البرده ... وشفت الاء تمشي بطرمتنا جانت يم باب الهول .....
(( باعتبارنا منطقه زراعيه والي يجمعنا بستان بسياج واحد لاربع بيوت سوه فالبيبان الخارجيه بيبان مجرد شكل يعني اي شخص يكدر يدفعه ويدخل عادي )).
شفتها تمشي طالعه بااتجاه الباب الخارجي فتحته وطلعت
طلعت وراها .. دخلت للبيت وسدت بابها
دخلت وراها دكيت الباب طلعت بس سوت نفسها ستوها كاعده من النوم
كالت"
الاء: ها غادة شكو .. ؟
سوت نفسها مستغربه جيتي بهذا الوقت حسبالها ماشفتها ...
غادة: انتي الشكو !!
الاء:شنو يعني ؟؟
غادة: انتي جنتي ابيتي شسوين ؟؟!!
الاء:هاا مو شفت الغنم مالت عمي داخل للبيت
دخلت طلعتهن كلت خاف يخربن الحديقه مالتج وفضل تعبان بيها .....
يصورلها تكدر تقشمرني بهاي حجتها
غادة:شلون دخلن واني باايدي قافله الباب
وانتي شلون دخلتي ..!!
الاء: شمدريني مخليه الباب مفتوح ودخلن
غادة/عفتها لاانا مقتنعه بكلامها ولاهيه مقتنعه قنعتني ....______يتبع
رايكم .....لاتنسوا لايك...نجمة ...توقعاتكم
ملاحظة/طبعا غادة مختفية من الصبح ليهسة عندها ظرف ...واحداث القصة يمها...وهستوها اجتني
تحياتي الكم #الكاتبة_شهناز_الخزعلي #جيمن_جلال
أنت تقرأ
قدري الاسود
Chick-Litحقيقيه اجتماعيه ...خيانه..حب..معاناه ..امراه من جيل أخر بقلمي الكاتبه شهناز الخزعلي..جيمن جلال
