قدري الاسود

الحلقة(6)

الحلقة(6) من قصه الحقيقة #قدري_الاسود

بقلمي #الكاتبة_شهناز_الخزعلي

غادة/مرت الايام واني الندم ياكل بيه شلون هيج سويت ليش ماضميت هذا السر ليش ظلمته.

ومره بليل كاعد نتفرج فلم روميوو وجولييت عجبتني القصه وتأثرت بيها مشاعر مراهقه ملخبطه وغير متزنه جان اذا ابوي موجود ممنوع نسهر ونشوف فلم وهو اصلا ب١٢ يخلص البث مو مثل هسه ستلايت وقنوات للصبح ...
اخذني عقلي وتفكيري ل نجم كلت بكلبي هو حبني من صدك لو ميحبني ميحاجي ابوي هيج وطلبني منه
وكمت من فراشي لان جنت متمدده بالهول كلنا حتى اخوي ونباوع سويت نفسي رحت اشرب ماي دخلت لغرفتنا طلعت دفتر وقلم وكتبت اول سطرين جانت اغنيه لعبد الحليم حافظ( من غير عتاب ياحبيبي من غير عتاب ) ...

وكلمات اعتذر بيها وشرحت الي صار واني اكتب مااحس اله انجرت الورقه من ايدي .فجئه شفت اخوي واكف فوك راسي ويقرا بالرساله الي باايدي كتبتها كلبي راد يوكف من الخوف شااحجي وشبرر وشكول انكر شاانكر وهو ساحبها من ايدي يقرا ويتحلف براسه.....

كضني من شعري ملخني تملخ سحبني من شعري للهول امي جانت نايمه فزت تصيح ياستار شكو شبيها اختك كاللها بنتج الك..... شوفي شكاتبه ...

هاي الي كالت شمر الرساله من فوك السطح هو انتي الي خليتي يدزها وراشديات ماعرف منين تجين ساعه يرفسني ابطني وساعه بظهري متت وامي  بس صافنه ولازمه الرساله ...

واني اشهك تركني برفسه بخاصرتي دمرت كليتي واخذ الرساله من امي كاللها ينزل ابوي واشوف شلون يتصرف.

لو شمايسوي احسه نقطه ابحر الي راح يسويي ابوي بيه صعد فوك بغرفته كمت الطم على وجهي شسويت بروحي شسويت امي بس تباوع جنها مصدومه اني اسوي هيج ...

نامت وعافتني اون من الخوف الي اكل عظامي اكثر من الالم الي اكلته كعدو الصبح تريك اخوي بس ميبباوع بوجهي وطلع للدوام   وامي هم اجيت ابوسها ماما اعتذر دفعتني شسوي ياربي صعدت لغرفه اخوي ادور وين ضام الرساله حتى اخذها ومن يريد يكول لابوي انكر واكذبه .

تمرد صار عندي خلي ضرب اخوي ولاابوي واصلا ليش هيج سويت فقدت ثقه اخوي الي هيه اصلا متهزهزه فتشت الغرفه شبر شبر ماكو كلبتها كلاب ماكو وين ضامها ؟

اايست ونزلت معدتي كامت تكلب ماعرف خوف لو الم لو جوع لان من الصبح مماكله شي لفيت راسي ونمت كعدت على لمسات اختي الزغيره صف اول ميس ياالله شكد رقيقه هاي البنيه ونسمه حتى صوتها منسمعه تمرر ايدها على خدي التجرح من الدموع

كالت: بسام يصيحج اخوي ...

كلبي كام يرجف خوف شيريد ؟

ميس: يكول خليها تصعدلي فوك اريدها .

صعدت الدرج بس كل بايه اصعدها روحي تنسلب مني شويه شويه الى ان وصلت لغرفته دكيت الباب...