قدري الاسود

الحلقة(13)

الحلقة (13)من قصه الحقيقيه #القدر_المظلم  #قدري_الاسود   بقلمي  #الكاتبة_شهناز_الخزعلي 

_____________________________
غادة/

كبرت بطني وحملي ثكل ولاعمتي ترحم حالي وتخفف عليه الشغل ولارجلي يهون عليه الاعيشه اروح لاهلي يوم يومين وارجع سكته مااحجي شي ورجلي يوميه يطلع لو سعدي الحلي لو رعد الناصري مواويل وهذا ينحب تكول ام جايبين ابنها شهيد اكابله مدري اضحك مدري ابجي عليه حالته بالنازل المصيبه اهله ولاواحد بيهم كال هذا خلينا ناخذه للطبيب نعالجه نشوف حالته كانو متعودين عليه واصلا عادي .

مره تورطت وكلت لعمتي:

غادة: خلينا ناخذه للطبيب؟

كبت بوجهي ...

ام زوجي:شبي قصدج مسودن اصحى منج.

سكتت ومره دزو عليه اخوته مجموعين ابيت اخوه الجبير ساعه ورجع مدخن وعيونه دم اول مادخل لزمني من ياخه دشداشتي وكال "

يحيى:هي حماره شاكيه لاخوتي

غادة: عليمن وشكو والله ماشاكيه لاحد منك .

عافني وطلع رجع بليل لكاني امدده بالغرفه دخل كال"

يحيى: كومي سويلي سم اتعشى.

كلت يالله راح ياكل نعمه بلكي راح يطيب رحت ركض للمطبخ سويتله عشا وجبته ..

يحيى: روحي جيبي الطشت والبريق اغسلي راسي ورجليه.

غادة:حاظر ...

ميخالف خلي كلشي يسوي بس يطيب رحت جبت الطشت وكمت اصبله على كيف وهو يغسل براسه ماعرف شلون طخت حافه البريق براسه مااحس اله الطشت مالت الماي الغسل بي راسه وكله صابون فوك راسي سبحني بي كله وشال البريق ركعه بالكنتور كسر باب الكنتور واشكال الغلط والفشاير اني واكفه تكول صنم حجاره مجرده من المشاعر والاحاسيس استفزه سكوتي وعدم ردي...

كام جرني وطلعني برا البيت وسد الباب هذا الحجي ساعه ١١ بليل المنطقه سنطه اتذب الابره تسمع رنتها بس صوت الكلاب تنبح الظلام برا يخوف كلت هسه يهدأء ويفتح الباب انتضرت نص ساعه ماكو هسه يفكدني ماكو اخر شي دكيت الباب دكيت ماكو مافتح  عفت الباب رحت لبيت حماي جوارينا ساكنين مشغلين مكيفات مايسمعون لو اكسر الباب .. يالله وين اروح وصوت الجلاب يخوف واني بطرك ثوبي اخر شي ايست كلت اروح لبيت عماتي متزوجات ولد عم ابوي بعد عن بيتنا ٣ كيلوات مشيت واتلفت لااحد يشوفني بثوبي وارجف برد وخوف تعبت كعدت على طابوكه استراح اضويه البيوت الي على الطريق مأمنتني بس من تعديت البيوت صارت ضلام دامس مااشوف حتى الطريق صوت الكلاب تقرب عليه اسمعهم قريبات عليه واني طكيتها ركضه حامل وارجف ماحسيت اله انا اباب عمامي ادك الساعه ١٢ونص بليل فتح الباب زوج عمتي استغرب يفرك بعيونه حسباله نايم.....