الحلقة(17) من #قدري_الاسود بقلمي #الكاتبة_شهناز_الخزعلي #جيمن_جلال
واطلع من ضيم واكابل ضيم ثاني ......
غادة/سنه كامله مرتاحه وعايشه مدلله بيت اهلي
سنه صار عمر حمزه صار يمشي ويحجي حجايات بسيطه مثل يصيح لابوي بابا ولامي ميمي يعني بيبي مايكدر يلفضها ....
امي مدللته وتموت عليه حتى ابوي وين يطلع ياخذه وياه والبنات كل وحده مستلمه مهمه وحده توكله وحده تلبسه وسارة اغلب وقته يمها حتى تنومه حيل تعلقو بي.
ويوم من الايام جانت لعبه العراق والسعوديه وجنه متابعينها بكل شغف هواياتنا مو رياضيه بس بذاك الوقت جانت العبه عباره عن تحدي وحرب نفسيه جان كل العراقيين منتضرين الفوز حتى يفرح كلوبنا ويوحدنا جنا كلنا نكمز من يصير هجوم ويصدها نور صبري كل ركله من المنتخب جانت تطلع روحنا بيها بكد مامركزين بيها....
واحنا مندمجين بالعبه اندكت الباب ومحد قبل يروح يفتحها خوف تصيع عليه لحظه او تمريره لو هدف مرتقب ...
صاح ابوي اذا متكومون تفتحون الباب اسد التلفزيون ...
كام اخوي يتأفاف ركض واجا يركض
كال: عمامي بالباب ...
رحنا البنات للغرفه الفوك مالت اخوي بيها تلفزيون زغير خليناها على العبه اصلا مابالنا شكو جايين عمامي وليش .. سلمو وكعدو...
اول مدخل ابن عم ابوي كال:
_ ها اخوي بشر خو ماهدفو علينا
ضحك ابوي ...
_لا بعد صارت جزائات
بقوو متحمسين بدون ميحجون ولاكلمه
وجاب المنتخب الفوز للعراق بضربه جزاء من فرحتنا نسينا احنا فوك كمنا نكمز ونركص
صاح ابوي ها خير شبيكم سكتنا وضمينا ضحكنا وبقينا نستمع لحديث عمامي الجايين بي وملخص الحديث يحيى دازهم حتى يرجعني وشارط يطلع ابيت بعيد عن اهله الي فهمته البنيه الي خطبها ماقابلين اهلها ومتندم لان خسرني ....
ابوي كللهم:
بابا: وندمه هذا اجه ورا سنه ليش ابنه يعرفه عرفها بمصرف بغيره ولو ممحتاجه بس اذا تريد تذكر شتذكر منه على شنو ارجعها الها بايعها زايده عليه لو مستثقل وجودها بلعكس اصلا هيه وابنها مونسينا يحلم ارجعها اله ولو يجيني راكع كال والامر الاول والاخير بيدها هيه وراح اصيحها كدامكم وسالوها .
صاحني ابوي رحت لبست حجاب وعباتي ودخلت سلمت ..ردو السلام بده ابن عم ابوي يحجي وكال:
_بنيتي احنا جايين من طرف يحيى والولد يعترف غلطان يكول اذيتها هواي بس خليها ترجع ونرجع مثل قبل وماكو بيت يخله من المشاكل وانتي عاقله وفاهمه وصبرتي عليه وان شاء الله الله يهدي سركم ها عمو شكلتي؟
أنت تقرأ
قدري الاسود
Chick-Litحقيقيه اجتماعيه ...خيانه..حب..معاناه ..امراه من جيل أخر بقلمي الكاتبه شهناز الخزعلي..جيمن جلال
