#حصاد-ألمواسم
👇
#فراقد
👇
#ألحلقة(( ١ ))
÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷
هديل // صباح العافية على أحباب فراقد
أحب أعرفكم عن نفسي ،وأحجيلكم قصة حياتي
لسببين :-
السبب ألاول:- الاشخاص العدهم أب وأم
أحمدوا الله وشكروا على هاي النعمة الكبيره
تربيتوا بحظنهم وتحت ظلهم وحنانهم
وألسبب الثاني :-تذكروا دأئما من يزرع الخير بالبداية
يحصد الخير بنهاية
واليزرع الشر بالبداية يحصد حشاكم صخام الوجة بالنهاية
ابدي اعرفكم عن نفسي
أسمي هديل شامل ....وبعد مااعرف اسم جدي !!!
وأمي أسمها شهلاء وبعد مااعرف اسم جدي !!!!
المصيبة مااتذكر أحداث طفولتي زين
يعني تجي بالي شغلات واضحة
وشغلات لا مااتذكرها زين بس تمر علية مثل الحلم
مااعرف ليش او شنو السبب
أحجيلكم قصة حياة أمي شهلاء
وألصدك أني مااتذكر قصة حياتها زين
لكن قلم فراقد راح يوصللكم مشهد من معناتها
من خلال ذكرياتي القليله عنها
أمي شهلاء مسيحية من أهالي ألموصل
كانت برشه أو برصة أو شهبه
مااعرف بعد انتم شنو تسمونها ،،
شعرها أبيض مو أحمر ،
وبشرتها ناصعة البياض
وحتى حواجبها ورموشها بيض
أبوية أسمة شامل هم مسيحي
وأتذكر شكله لحد هسه مطبوعة ملامحة بالي
متوسط الطول ،وحنطاوي ،
وشعره بي كسره شويه خشن
وكانت شواربه شوية طويله
وعيونه صغيرة مفتوكة لونها جوزي
الي أعرفة أو أتذكرة أني مواليد ٨٠
وحفظت مواليدي مره أبوية كالي //فرق بيني وبين عمرج ٢٠ سنة
فسألته شلون يعني مااعرف انت شدكول
كالي //انتي مواليد ٨٠
وأني مواليد ٦٠
أبوية مااعرف شنو شغلة جان ،
بس يمكن يشتغل بمطعم
لو عندة مطعم اكلات شعبية صغير .
من جان يجي بليل يطب للبيت يغني
ويدندن ويه روحة وما يمشي عدل
يروح منا ويجي منا
ويجيب وياة اكل من بره
ومرات لا ما يجيب
من ابوية يروح الصبح الشغلة
أبقى وية امي شهلاء بالبيت
والمصيبة أمي جانت حاكمتها بيبيتي أسمها عشتار
مراه صلبة وقوية ووكحة وبخيلة
وهواية تحجي وتعيط على أمي
وأسمعها دائما تعيرها وتكولها//يالمصلاويه يالبرشة
منين الرب جابج عليه .
وعماتي اتذكرهن جانن كبار بالعمر
لان شعرهن بي شيب ،
وشكل وجهن أكبر من شكل وجه أمي
وحدة أسمها ((راعوث ))هاي الجبيره
هاي أحقد خلق الله ،
اتذكر دائما تصيح عليه ومرات تضربني
وتطردني اذا اجيت اكعد يم بيبي بغرفتها
وحدة أسمها ((أديل ))وهاي أصغر منها
هاي روحها بالكشخة واللبس ،
وامي خدامة عدها ،لازم تنظف البيت بدالها
اذا عدها طلعة ،او من يجن عليها صديقاتها
أنت تقرأ
حصاد المواسم
ChickLitلكل زرع موسم لحصاده .. وعادة ما يحصد الزراع نتاج ما يزرعون .. ومواسم الحصاد هي مواسم اُنس وفرح وغبطة , إنها لحظات جني الثمار .. بعد جهد وتعب , وبعد عناء سواء طال الموسم أو قصر ..
