حصاد المواسم

ح ٢٢ (( ألجزء ألثاني ))

ألحلقة ألثانية وألعشرون ///من أحداث قصتي///
        
بعنوان /////حصاد ألمواسم

خطت بقلم ///فراقد حسن علي ///
————//////———-//////————/////—

مشتاگلك يالـ مبتعد
يا روح تشبه نيتي
حَتى النفس لمن أريد أتنفسة
بلياك يجرح ريتي ......
————//////———-//////————/////—-

دخلنه هنا بسنة ال ٢٠٠٥ ...

وصار عمري هنا ٢٥ سنة...

بس شنو مو تكولون صارله محمد شهر ونص من سافر
لا تكولون صارله سنين...أنسليت من ألقهر وراه

محمد وألولد عصامكو وسلامكو بخير...
نسمع أخبارهم من صديق قايد ألوصلهم ألسوريه
هو يندل مكانهم...ومرات يمر عليهم ،
هو هناك يساعدهم بسورية يندل أكثر منهم.

وباقر...ألحمد لله خلص دوامة بالكلية مال ألموصل
وجاب نقل لدوامة من ألموصل لمستشفى بابل ألتعليمي
يدوام بيها يوميه...ومرات يلزم بيها خفر
ألحمد لله من حصل شهادة الكلية وتعيين
ودوامة هنا قريب...مرتاح بشغلة الله يوفقة

وألحمد لله علاوي مستقر بشغلة مال الزراعة والري
يروح ألدوامة ألصبح يكول//هيج كلاوت بس نسجل حضور...ونكتب أسامينة بالدفتر...لأن بعدها ألدولة تايهه
والعصر يروح يطكطك بالورشة بعد يحب ألنجارة .

وسجاد...صلوات على ألنبي خلص من كلية ألمهندسين صار مهندس مال الحواسيب ما أدري الكهربائيات...
ومرت جاسم ألفيلية...مو معلمة تشتغل بالمدرسة
توسطلة وياها يم مدير ألمدرسة...وهو رتبلة ألسالفة عودين يعرف وأحد وتوسطله يمه...وعينه بالمدرسة مدرس مال ألحاسوب...بس أخذ من عنده خوش لهدة مال فلوس...ألحمد لله من حصلة على شغلة
وكام يداوم .

وعون صلوات هسة صار رجال...
وصار بصف ألخامس أدبي ...
سبحان الله حباية ومكسومة من ألمرحوم عطأ.

وحمودي حبيبي...صلوات صار بصف ثالث متوسط
وصار أطول مني...وهم رفيع جنة باقر
بس بعدني أشوفة صغير...أموت علية
بالأخص هو ... وعون أحسهم جهالي....ربيتهم على أيدي .

أني هنا لجيت على كميلة نروح لبغداد
كالت//ميخالف باجر نغبش لبغداد .
والله الأوضاع تخوف ...
وسوألف طائفية شاعلة ألجو ...
ونسمع أسم الله بسيارات مفخخة تتفجر على ألناس
بس أني بعد ما اعرف لجت روحي على الزيارة .

والله حتى من راحوا للأربعيين مال أبو صادق
لا رحت ولا وصلت...حتى نهلة ما خلتها كميلة تروح
لأن خطية تسحل بروحها سحل...وبالكوة تمشي

صدك ثاني يوم...ونغبش بس أني وكميلة وبتول لبغداد
كملية خافت على ألولد...ما قبلت يروح وأحد منهم ويانه لا ينذبح بالطريق...الأوضاع كلش تخوف.

والله صعدنة من الكراج بوجهنة للكاظمية...
ألحمد لله زرنة أبو الجوادين
ومناك أجرنة تكسي لشيخ عبد ألقادر ألكيلاني
ما أدري أحس روحي هنا بهذا ألمكان تهجع وتستجن
الله يذب عليه هدوء وسكينه...زرنة مرقد أبو محمد
أني وكميلة ويانة بتول...وصلينة ألصلاة الواجبة
وصلاة الزيارة.