حصاد المواسم

الحلقة ألاخيرة

ألحلقة الأخيرة  ///من أحداث قصتي///

بعنوان /////حصاد ألمواسم

خطت بقلم ///فراقد حسن علي ///

----//////----//////----//////-------/////---------

تهون جميع الشدائد والصعاب....
أمام عبد لا يحمل في قلبه إلا التوكل على الله.... والإيمان بقضائه....
############################

بتاريخ أليوم ألاربعاء المصادف// ١٤ /٧ /٢٠٢١

علوووووولي من عسنك بالصخونه
ولك كون تصخن يومين ثلاثه وأفتك منك ...

محمددددد أشك ثوبي واطلع للوادم معرينه
تعال لفروخك سودنوا الخلفوني
أريد أكضي شغلي ورايه هوسه الكليجه.

محمد ولا جنه يسمعني حاير يكنك
ويكلب بالفلك الاسود ألفيس وعايف فروخه هجموا ألبيت....

من ألصبح بلشت شغل وتنظيف
واركض وأجهز وارتب علمود هلت عيد ضحيه
بعد جم يوم بسلامه...ولازم أكمل الكليجه
حتى نغبش للنجف أنسير على موتانه....

وابشرجن من سنه ٢٠٠٣ ولهسه
ما عيدوا ألعراقيين بيوم واحد
لأزم نصير نصين....ولازم يجر العيد عدنه أسبوع
وما ظنتي من هذاك أليوم ولليوم اي عراقي
فرح بجيت عيد رمضآن ...
لو عيد ضحيه...
من وره الضيم والقهر المر علينه
وألعباس كمت أحس ايام العيد أيام عاديه
حالها حال أيام السنه الباقيه.

طلعت للحوش وألجح غيث وليث وقسور
متشلبهين التوثه وناكتين كل وركها بالكاع
وأني عطت بكل صوتي //محمددددد ما تكوم لولدك
موش نبشوا شامل وطلعوه من كبره

وألعباس أستحي أكفخهم واحدهم صاير اطول مني
غيث يلفني جوة أبطه...وليث هل عرض جتافه
وهذا قسور ياكل متسلق صاير بطول علاوي

طلع محمد من الصاله يتمندل
وهمزين الله كدره على هذن الكلمات وحافظهن
وصاح//ولد الكلب عليش ما تردون على أمكم

باوعت عليه بطرف عيني وكتله//عليك ألعباس
هاي كل قوتك...رد المكانك اخافن على قلاقيلك
لا يشكفهن الهوا.

محمد بالبيت مطلع أيديه من الروازين
وأنوب صار مدير عام...وسيارة تأخذ...وحمايه ترجعه
ونفش ريشاته مية موظف ماأعرف اكثر جوة أيده
هذا يخابره....وهذاك يعلقله...وهذا يجطه بااعجاب
وهو حاير ينشر صوره بفلان موتمر
وبفلان قاعه....وبفلان أجتماع
واني الاكلت تبن وطحت بيها.

مشيت وهمشت رجل ليث وسحلته
وكمت اخمط برجل غيث اريد بس الكفه
وهذا الهتر قسور نط من هذيج الجهه
ومشى لبيت أهله...

لزمت الماسحه ألهم وكتلهم//هسه تنظفون ألكاع
عيب عليه امد ايدي عليكم والبكدكم معرسين
ولكم استحوا على لحاياكم وشواربكم
باعماركم الخلفكم معرس وعنده اثنين نسوان