حصاد المواسم

ح ٨

#حصاد-ألمواسم
👇
#فراقد
👇
#ألحلقة((٨))
÷÷÷÷÷÷÷÷÷÷÷÷÷÷÷÷

قبل ما نطلع باوعت للساعة جانت موجودة بالهول
جانت ب ٨ وعشرة الصبح بالضبط
وصادف يوم جمعة ١١/٥/٩٠

نور كامت تبجي ،
وهي تمشي تتلفت وراها على البيت
وتمسح بدموعها

وكفت بنص الشارع وبجت بصوت عالي
وتنهدت بحسرة شلعت أعظام القفص الصدري
ورجعت باوعت على بيتهم وألتفت بسرعة
جرتني من ايدي ومشت سريع ،
ودموعها صارن مطر

وصلنة للشارع وكفت نور سيارة وكالت للرجال //
لبابل ... للمسيب ،لضريح أولاد مسلم

الرجال كاللها // بعيدة
بقى ساكت شوية
وانوب كاللها // صعدي بس الكروة تصير عليج ثگيلة

كالتلة // ميخالف قابلة بس وصلني
صعدتني بالصدر ،وهي صعدت اليورة

باوعت على الرجال جبير بالعمر ،
ولابس عرقجين بيضه ،
ولحيتة وشواربة هم بيض
ولابس دشداشة وعليها حزام ،
وكرشة كاعد على رجلية

باوع على نور بالمراية الصغيرة الموجودة كدامة
وكاللها // بوية اسمحيلي اذا ادخل ،
بس الطاكج هشكل باجر شيكول لله ،
شنهي بوية أنتي مكطوعة من شجرة
ورجلج هشكل جاير عليج

هي ما ردت علية ،بقت بس تبجي

هو كاللها // بوية اوديج للمستشفى
قبل لا نتوجة على طريقنة

ردت علية // لا يابة مشكور وصلني لاهلي
وجزاك الله خير هم يعالجوني

أني بقيت أباوع من جامة السيارة
شكد حلوة الطرق ،والسيارات
والشمس تجي على وجهي وية أستدارة السيارة
وأغمض عيوني نص حتى أركز على الطريق

لزكت خشمي وحلكي على الجامة وبقيت أباوع
أنوب أنادريت على نور
كتلها //انزل شوية الجامة اتنفس هوى حلو ؟؟

أشرتلي براسها اي ،،

اني نزلت نص الجامة ....ونزلت من الكرسي
وكفت على طولي ....وجهت كل جسمي على الباب
ولازمة الجامة من فوك بثنين ايدية....
واباوع على الطريق
والهوى حلو بي برودة وسريع يخربط بشعري

باوعت على نور وضحكت بوجهه
هي أبتسمت بوجهي ضحكة صغيرة
ورجعت تباوع على شباك السيارة
وتمسح بدموعها

الرجال مشغل مسجل... يمكن بكرة ... لو راديون مااتذكر
وطلعت أغنية هواية تقهر وحزينة والتغني أمريه
أسمها زهور حسين وغنت //غريبة من بعد عينج يايمه محتاره بزماني
ياهو الليرحم بحالي يايمه لو دهري رماني
حاجيني يايمه فهميني يايمه
غريبه من بعد عينج يايمه
يمه محتاره بزماني

,,,,,,,,,,,,

قلبي لو فرح انت فرحتي قبلي ياحبيبه
ترد الروح لو يمي قعدتي يالريحتج طيبه
حاجيني يايمه فهميني يايمه
غريبه من بعد عينج يايمه
محتاره بزماني
,,,,,,,,,,,,,,,