#حصاد-ألمواسم
👇
#فراقد
👇
#ألحلقة((٣١))
××××××××××××××××××
بعد ما كفينه عشا الخطار من الرياجيل والنسوان
وشربناهم الجاي ...
وهم قدموا أهداء سوره الفاتحة ...
للعجوز .. والعطأ الله يرحمهم ...
ودعوا لله يتقبل هذا الثواب .
وباقر قرة شوية قران ...صاير صوته حلو
عاد الخطار تشكروا من ألسيد ...ومحمد المصروع
على العزيمة وراحوا .
هنا وحدتنه غدت خركة من كد التعب
شويه وأكوم أبجي ...
من شفت المطبخ يروج بالمواعين
تشلحنة أني ...ونور ... وحدة تغسل ... وحدة تعلي
وكميله كاعدة وتسفط بالمواعين ...
يمكن ساعة يلا نظفنه المطبخ .
اني بعد ما أشوف من كثر التعب والنعاس
بس أخذت ملابس ثخينة...وسبحت بسرعة وطلعت
حتى ما مشطت شعري ...لفيته بالربطة
ولفيت راسي ونمت .
وقبل لا أنام هددت نور ..بس تكعدني الصبح
أخلي حمودي يعضها ...وشرط إلا يشلع من جسمها لحمة ... وهو بعد يكيف على العض
الفجر ...حسيت روحي مخنوكة من الحر
ملابسي ثخينه ...وغطاية ثگيل ...
وهم شبعانه نوم ،
ومن فزيت بطني بيها لويات خفيفة ...
كلت وية روحي ...أكيد من كثر ما أخذت برد البارحة
بقيت نايمة بفراشي ...شوية وحسيت أكو شي نزل عليه ...ألصراحة خفت ...وأستحيت
حسبالي تبولت على روحي ...
كمت بسرعة للتواليت ...وأشوف ألحبابة شرفت عليه وسوتني مراه من وگت .
أني أعرف بكلشي يخص ألحبابه وسوالفها
من جنت صغيرة بيت نور ...
وأسمع من أقبال وأبتهال وباقي البنات ...
يعني لا خفت ولا أستغربت .
بس ألصراحة أنقهرت ...
يمكن البنات الغيري ... يكولن لأمهن وتفرح بيهن وتعلمهن ... مو مثلي أني ما عندي لا أم ولا أب
خلف الله على نور مداريتني ... ومراعيتني
الله وأعلم ...لو ما أخذتني هي من ضعت
جان شصار بحالي ... وين صار بية الوكت
وجان وين شمرتني الدنيا بأي نگرة خايسة
الحمد لله على كل حال .
غسلت ... رجعت للغرفة رتبت حالي
ورجعت تمددت بصف نور ...هي فزت عليه ...
أجيت وتقربت عليها وختلت بحظنها ...
هي لفتني بيدها وحظنتي على صدرها ...
ورجعت غفت
شوية وأذن ألفجر ...
وأسمع صوت ألسيد ...يتنحنح بالهول
كمت من مكاني ... وطلعت صبحت عليه
هو غسل وتوضى وراح للمرقد يصلي ...يلا يرجع يتريك
أني رحت سويت كلاص حليب حار ...وطكيت بي بيضة ... وشربته .
وحضرت كلاص ثاني لباقر ...علمود يقوي صوته ويحافظ على حنجرته ما تجرح ...لان يقرة قران بالمدرسة ...وهم يشرب قبل لا ينام ...
كلاص مي دافي وخاشوكة عسل .
سلكت كوم بيض ... وطلعت ألخبز من الفريزر
وخدرت الجاي ... وحضرت الاستكانات
بيت ألسيد ...ما عدهم مجمده
بس أكو ثلاجتين بالمطبخ ...
وحدة جانت مال بيت نور ... وحدة مالتهم
والثلاجة الثالثة بغرفتنه ...جانت مال غرفة نور الفوك
ثلاجات المطبخ ...
وحدة للحليب والروبة واللبن والجبن ونجانة البيض ...وفريزرها للتجميد
والثانية...للمخضر والخضرة والفاكهه والأكل الزايد
وهم فريزرها للتجميد .
أنت تقرأ
حصاد المواسم
ChickLitلكل زرع موسم لحصاده .. وعادة ما يحصد الزراع نتاج ما يزرعون .. ومواسم الحصاد هي مواسم اُنس وفرح وغبطة , إنها لحظات جني الثمار .. بعد جهد وتعب , وبعد عناء سواء طال الموسم أو قصر ..
