حصاد المواسم

ح ٤٢ ((الجزء الثاني ))

ألحلقة الثانية و ألأربعون ///من أحداث قصتي///

بعنوان /////حصاد ألمواسم

خطت بقلم ///فراقد حسن علي ///

----//////----//////----//////-------/////---------

إن ضاقت بك النفس عما بك ....
ومزق ألهم قلبك واستبد بك ....
فكن موقناً بأنّ هنالك باب يفيض رحمة ونوراً ورحاب...
باب إليه قلوب ألخلق تنطلق ... فعند ربك باب
ليس ينغلق .

××××××××××××××××××××××××××

ولا وكعت هذيج اللمه الحلوة...والسوالف التخبل
والضحكة الحلوة لأل هاشم...

أجت مسك بت باقر عايطه وتصيح// مات كنووش
كتله ألولد.

كمال وعلاوي هم كاعدين قريب باب الهول
ترادموا بطلعتهم من باب الهول وركضوا للشارع...

وركضوا باقي ازلام هاشم للشارع...
يبووو صوت جاسم وباسم هز الكاع وهم يصيحون
//يااااااابووووويه مااات ألولد.

ركضن ألنسوان للشارع...والجهال تتراكض ويانه
بين ما ركضت اني للشارع وشايله ليث بيدي
وغيث عفته مجطول بالكاع.

أشوف ندى مفرعه بنص ألشارع وتمشع بشعرها وتلطم.
وأم ناهض طيحت وصله من السمه بلعياط ...

سألت رقيه// ولج شكو

كالت//أبن جعيوي ضرب كنوش إبن عمي ناهض
على راسه بالطكطاكه وكنوش مات ...
أخذه عمي جاسم وباسم وكمال للمستشفى.....

يمه أسم الله ،، ربي يحفظ الشباب...

يا ساتر ندى تسودنت...يحيرن شلون يسترنها ألنسوان
سحلنها ودخلنها لبيتنه...وهي تصيح//ولجن حلن عني
وليدي مات.

والله خطيه ندى أستغفر الله دولبتها الدنيا
انشلع كلبها بحب ناهض وجان حبها من طرف واحد
وهي ألحبته وأعترفتله بحبها ،،، يلا تقدم الخطوبتها وتزوجها.

بالبدايه صار عدهم أثنين ولد...
وصارت سالفه كتل ألمرحومات...
أنسجن ويه محمد أول مره ....
وخلص محكوميته وطلع .

من طلع ،،، حبلت من جديد...
وصارت سالفه كتلت ألمرحوم عطأ ...
وأختفاء محمد وطلع محبوس من جديد...
وأنوب أجى بشير سحل ألمرحومة حياة...
وأنوب سحل ناهض وياها...
ورجع حياة بالتابوت...وناهض عدموا ..

خطية هي من جابت كنووش هو ناهض ما شافه...

وهو مو أسمه كنووش،،،أسمة الصحيح كريم...
بس يلبكوله كنووش.

هو أجى بسنه ال ٩١ بس بنهايه الشهور ألاخير من ألسنه
يعني هو بزر الكعده بولد ناهض ...

أخوة ألجبير مواليد ٨٩ ...
والثاني مواليد ٩٠ ...
هذوله ولادتهم بدايه كل سنه...بس هذا كنووش جاي بنهاية ألسنه مال ٩١ ...
عمره هسه تقريبا ١٦ سنه لو طب بل ١٧ .
بس هو عنده سقوط وبعده بالثاني متوسط.