حصاد المواسم

ح ٥٠ ((ألجزء ألثاني ))

ألحلقة ألخمسون ///من أحداث قصتي///

بعنوان /////حصاد ألمواسم

خطت بقلم ///فراقد حسن علي ///

----//////----//////----//////-------/////---------

بالطريق سجادكو شو طبك يم محل
ونزل يركض دخل للمحل ...
وهاي سيارات الزفه كلها طبكت يم سيارتهم...
وكل ناس يصيحون//شكووو.

هو طلع من المحل يركض بيده بطلين مي
ومخبوص ويصيح//خاله ام ابراهيم تعاي يمي
(يقصد على نور)

وننزل اني ونور بسرعه وركضنه على سيارتهم
والرياجيل نزلوا بالشارع...
وأمها وخواتها هم نزلن وصارت هوسه
وكل ناس يصيحون //شكوو .

ونلكي نرجس متخربطة...
وهو سجادكو رافع البركع عن وجهه...ويشربها مي...
ويكلها//شو حاجيني
وهي ترجف تنفض نفض...وبالكوة تبلع ألمي
حتى نزل على بلعومها وبدلتها...

نور بقت تحجي وياها وتكلها//شبيج خاله شو حاجيني
بس كالت//أخاف ... وكامت تبجي.
سجادكو عاط بيها //منين تخافين من طلعتج من بيت اهلج وانتي تصيحين حباب أخاف...
هي ماحجت بعد ....

محمد كال//سجاد صوتك الوادم منا ...
ام إبراهيم نزلي البت وصعديها ليوره وصعدي وياها
وانت سجاد ارجع ليوره...أنا أسوق

والله سجادكو سكت...
واني ونور وام نرجس...نزلنه نرجس وصعدناها ليوره وكعدت يمها نور...واني ركضت لكفت بشه من حظن نبأ
وأجيت صعدت ليكدام بسياره العرسان
ومحمد صعد يسوق...فد كيفت
من البدايه وجان صعدني سجادكو هيج احسن
هو رجع صعد ليوره...ضحكت ضحكه مال شريرين
هو سجادكو كال//خوب انتي طاح على كلبج مي بارد.

لحد ما وصلنه للبيت واحنه نسمع صوت بجي نرجس
ونور تهدي بيها وتكلها//خاله كولي يالله وأقري قرأن
وسجادكو ينافخ وكلساع وكال//عساها بركبة السواها.

محمد دخل سياره للحوش...ونزلنه نرجس...
سجادكو لا لزمها ولا وصل يمها.
كعدناها بالصاله...

من رفعت نور البركع عن وجهه...
ماباقي لا مكياج ولا وجهه ما مكلوب من ألبجي
كعدت نور تعدل بيها...وتمكيجها من جديد.

هي شويه وفكت...وبقت تباوع على ألنسوان وألبنات اليركصن...وهوسة الجهال.

الناس الراحوا ويانه بالزفه طشوا
ماكو عشا...البارحة عشيناهم...
بس اصدقاء الولد...والكرابه عشيناهم
وهم هوسه والله نفس الشي .

يمكن ساعه ب ٧ المغرب صاحوا//صعدن العروسة
ألشاب يردون يزفون العريس.

طوعه صاحت//يحبايب بدون زعل
بس هديل وأم ابراهيم وام قسور يصعدن وياها
ممنوع وحده تصعد وياها...سيد سجاد يلعب بينه فلك.

بس من صعدناها أمها صعدت ويانه .

وهي نرجس أنصكت من الخوف والرجيف...
وأمها تكول //والعباس هاي ألبارحه واليوم هذا حالها
أنوب لا اكلت ولا شربت...عودين خالتها حجت وياها
وعلمتها على العرس وهي أنصكت...وحك ظلع ألزهرة كلشي ما تعرف مو عدالج تتعاير عليجن .