#حصاد-ألمواسم
👇
#فراقد
👇
#ألحلقة((٢٣))
××××××××××××××
أني هواية تعبت ...ونعست ...وعيوني كامت تحركني
دخلت بغرفة كميلة ...وأخذتلي زاوية ...
ومددت ......
والنسوان الكاعدات بالغرفة ضوجني .... بس يسولفن
بس نمت ... لان هواية نعسانه .
كعدت على صوت سهاد تكعد بيه...ماادري شكد نمت
كالت // ولج ساعة ب ٩ الصبح ...والوادم عدها عزه
وانتي نايمة ...دكومي شدي حزامج واكفي وياهن
كمال...وسلام راحوا يجبون ألسيد وكميلة من بغداد ،
ويشوفون بدربهم محمد مسوي عمليه لو بعدة
وأذا مسوي يناوبون بدل عصام ...
كتلها //ولج سهاد ...هوايه تعبانه ...وجسمي مكسر
ما أعرف شبيه ،
كالت //دكومي غسلي ... وألا أكلج أسبحي
ولج أنتي ليش بيج ريحة صنان ... ومصنجة
كتلها //والله سبحت البارحة ... بس ما أعرف ليش
تصير بيه ريحة مو طيبه.
كالت// هسة كومي أسبحي ...
وأني أروح للبيت ... أجيبلج من عندي خبطة
أني مسويتها ... وأجى بسرعة
بس كون أكدر أطلع ...لان الجادر مليان زلم
كمت للهول ... وأشوف أنتصار موجودة
وهي كاعدة بنص الهول ...وتلاجي النسوان
ونور مجطولة على جهه ...
وثوبها من فوك مشكوك ومعكود ...
مخلية أيدها جوة خدها ...ونايمة صفحة
وجهه كله مزلغ ... وشعرها مكفش
رحت وسلمت على أنتصار ...خطيه هي باوستني
وسلمت علية وكالت// بناتني موجودات بره
أكعدي وياهن ...ينشدني عنج
رحت على نور كعدت يمها...كالت//كومي غسلي وجهج
وأكليج لكمة ... لا توكعين عليه
والله مابيه حيل أشيل روحي .
كتلها //هسه راح أسبح منتظرة سهاد تجي
ماجاوبتني ... بس حركت راسها يعني أي
أخذت هدوم ألية ... من خانة المعرض
دشداشة ثخينه لونها نيلي طوخ ...
لبستها بفاتحة عطأ...هي بالأصل دشداشة كميلة
بس سوتها على كدي ...وياها أتك
وبلوز ... وبجامة ...وداخلي قطني
وطلعت كعدت باب الحمام ...أنتظر جية سهاد
ماأدري ليش أحس كل النسوان يباوعن علية...
ما أدري مستغربات من شكلي ...
ما أعرف مايعرفني أني منو ... ؟؟
أني هم ما هتميت ألهن ....
بقيت هدومي بحظني ...وبقت كاعدة باب الحمام
شوية وأجت سهاد ... جايبه بيدها علاكة
فتحتها ..بيها بطل كزاز مال حليب ألمعقم أبو غريب
سادة راس البطل بعلاكة وعود ...
وفرشة أسنان جديده ...
ومعجون أسنان ...
وصابون غار حلبي ...
كالت//طبي أسبحي ...
واستخدمي الصابونه هاي ... بالليفة .
وغسلي بيها شعرج ... وفرشي سنونج .
ومن تخلصين ... أخذي شوية من هذا البطل
بي مي ورد ... وشب... وعنبر
وخلي جوة أباطج...وبين رجليج ...
مو تخلين هوايه وتخلصينه ...لا أمسحي بي مسح
أنت تقرأ
حصاد المواسم
ChickLitلكل زرع موسم لحصاده .. وعادة ما يحصد الزراع نتاج ما يزرعون .. ومواسم الحصاد هي مواسم اُنس وفرح وغبطة , إنها لحظات جني الثمار .. بعد جهد وتعب , وبعد عناء سواء طال الموسم أو قصر ..
