#حصاد-ألمواسم
👇
#فراقد
👇
#ألحلقة((٣٤))
×××××××××××××××××
وأجى يوم ألجمعة يوم شرب ألشربت .
وأني بحسابي يجي بس حسيون...وأمة...وأخته خمائل
ويشربون ألشربت ويرحون ...بس لا حسابي طلع كلش بعيد .
نور ...من ألصبح عدلت حواجبها ... هي تعرف تشمرهن
ونهلة تعرف تحف ...كشت شواربها
وكميلة أنطتها ديرم كالتلها // خلي بحلكج يبض ألسنون
ودخلت سبحت ...ولبست كلبية لونها أزرگ فاتح
خيطتها ألها أم سهاد .
من طلعت من الحمام ... فيرت شعرها ...
وعافته مفتوح ...ولبست طوگ أبو البلك ...
وخلت كحلة ... وحمره وردية خفيفة
وصبغت أظافرها بلون وردي ...
ولبست كلادتها الذهب ... ومحبسها
طلعت نور ألقديمة ألتلمع من جنة بغداد
أني هم سبحت ...ولبست البرنسيسة
ألشترتها اليه نور من رحنة لمرقد أبو طلبه .
ومن طلعت من الحمام ... نور فيرت شعري
وسوتلي ظفيرة فرنسية ... كلش أحبها
لان شعري بعد سالفة ألزيان صار أثخن وأحلى
و طول ...طلعت الظفيره كلش حلوه
هي نور ... خلتلي كحلة كلش خفيفة بطن عيني
وما قبلت أخلي حمرة .
وخليت من القلونية مالتها ... هي تموت على عطر قلونية ألمروج
نور محتفظة بكل شغلات أقبال وأبتهال ...من مكياجات وعطور
بعد ما تغدينه ...وأني أليوم كعدت مرتاحة
لا أشتغلت ولا أبد ... ألبنات هن أشتغلن
أني كعدت أصبغ أظافري بلون وردي ...نفس نور
ألسيد ...بدل ولبس دشداشته الزبدة لونها حليبي
وياها غترة وعكال ...طلع كشخة .
والولد وياه كشخوا ...هم لبسوا دشاديش علاوي
...وباقر ... وسجاد ... وعون وحمودي لا لبسهم عادي
وكلهم بجفة من كشخوا ...ومحمد ألمصروع من كشخ بجفة ...لبس ألدشداشة ألبيضة الزبدة
وقبلها زين لحيته وحددها ...وطب سبح
وطلع بدل ...ولف السبحة على أيده مثل الأسوار
ولبس محبسه ألفضة ألبي فص جوزي بيدة أليمنى
ومن رش قلونية ألبروت ...ألبطل ألاخضر الكزاز
مو هذاك أبو شيشية البلاستك...مو هلكد طيب عطره نفس هذا ...يا بوية سحل روحي وراه ... ومرغلها بالتراب بعد
كمت أغلط على روحي...كبر حتى كبر
فضحت روحي ... كلساع أصفن عليه
وأباوع علية شلون الدشداشة البيضة مخبوطة
ويه سماره .... والله هو طالع العريس
يالله ...أرحمني وعقلني ...مو راح أنفضح وأنشهر
هو يضحك ويشاقة ... ويه ألسيد وطوعة
وأني من يمي أضحك على ضحكتة .
والله هن عقلي ..وعيوني ما يسمعن كلامي
عقلي مركز وياه ...وعيوني تبقى صافنه عليه .
أنت تقرأ
حصاد المواسم
ChickLitلكل زرع موسم لحصاده .. وعادة ما يحصد الزراع نتاج ما يزرعون .. ومواسم الحصاد هي مواسم اُنس وفرح وغبطة , إنها لحظات جني الثمار .. بعد جهد وتعب , وبعد عناء سواء طال الموسم أو قصر ..
