حصاد المواسم

ح ١٨ (( ألجزء ألثاني ))

ألحلقة ألثامنه عشر ///من أحداث قصتي///

بعنوان /////حصاد ألمواسم

خطت بقلم ///فراقد حسن علي ///

-------/////------------/////-----------//////---

ناذر نذر لو رجعنه ومات الافــــراك
سبع شمات اذبح جوه رجليك
----//////----//////----/////-------------

وصدك من أليوم ألجايت بي كميله بتول أنطتنياها وصارت بنتي...أني أغسل وابدل...واحظن وأكمط..
حتى ما رضعتها...ولا خلتها بحظنها
كمت أشربها ممية...وية نسمة بت باقر
هي أكبر منها بسنتين نسمه مواليد ٩٨ جتي للدنيا
بنهاية ألسنه .

ومن هذا اليوم أني صرت أم بتول ...

وألنسوان كامن يجن على كميلة...يباركلها على جية بتول...ويتحمدلها على سلامتها .

ألولد بس يضحكون...وعلاوي وباقر من يسمعون بتول تبجي...يكولون النهله لو الفاطمة//كومي شوفي حماتج شبيها.

وعلاوي من نزل للولاية...يجيب غراض لورشة ألنجارة
كص وياة عباية جديدة لكميلة..وأجى أنطاهياه هدية على جية بتول..
.
وأنوب هي الما راضية زعلت علية
تكله//شنو تمزق عليه...وتضحك على شيباتي.

هو دنك على راسها وباسها...وكاللها//والله مو أمزق عليج حشاج...بس جايج محرم خيطها والبسها بثواب أهل ألبيت...والمرحوم عطأ...وادعيلي الله يوفقني .

أني أحب الشته بزيناته وبشيناته...أكثر من الصيف
والله بالصيف روحي تنسحن...وأموع من ألحر
والمبردة تشمر علينه هوى حار تكسبني .

وحتى ألجقة ما أحبها بالصيف تلعب روحي من ألحر
جنت أبقى أطرد بالمصروع...وهو هسة بدون كلشي مسودن علية...وأنوب أجتني سالفة ألتهاب البروستات صفحة...يبووو شدود روسكم يكرعان ...
هسة ألحنتوش ما يشتغل عندة...يبقى بس يتأفأف وضايج...ويصح ويرعد على راسي...والله حيره
قابل أني مرضته.

وطلع كلبه قاسي...صارلة فوگ ثلاث أشهر من هاجرني.

وأبوية ما ادخل يكول الكميلة//ممنوع واحد يدخل بيناتهم خل هم يحلون مشاكلهم بيناتهم.

بس أني اعرف أبوية يريد يعاقبني...علمود بعد لا أفشل محمد واحجي بشي يخصة برة غرفتنه...
وهذا الحجي فهمني عليه سجاد وكالي// بعد لا تسولفين بشي يخصكم جدام اي بشر تعتبر عيبه عليج ويكولون ألوادم ما تحشم راعيها .

سبحت...وبدلت ولبست دشداشة كودري عريضة شوية
بكتها من نوره...عجبني خياطها.

بهذا أليوم...وره العشاء تقريبا ساعة ب ٧ بليل
وتسريح علية باسم...ونسوانه أثنيناتهن
ندى و بسمة وجهالهم ...

ورة شوية...جفتنه جاسم ومرته وجهاله .

وأنوب جفتنه...عصام ومرته وجهاله