#حصاد-ألمواسم
👇
#فراقد
👇
#ألحلقة((٤١))
×××××××××××××××××
ألاخرس...وألعثر... وألطاح ...والماشاف
ودموع ألمفارك... وأليحب سكته
وأحساس ألمذله ... وحسرة ألمسجون
هذن كلهن شفتهن ....من لبست ألحلقة أنته.
×××××××××××××××××××××××××
جنه كاعدين كلنه بالهول وره ألعشا ...
أني جنت كاعدة كدام كميلة...وألف وياها كبة
ومو هلكد أعرف ألف ألكبة طويله
بس ألمدوره أعرفلها .
وألولد...باقر..وعلاوي..كل واحد لأزم كتابه ويقره ...
والي كاعد يكتب ألواجب ألبيتي .
وألسيد كاعد يتابع نشره الأخبار ألرئيسية
تطلع ألساعة بسبعة...يقدمها دائماً ألمذيع أكرم محسن
فد مذيع حباب ...وكلش رزن من يطلع
وصوته حلو من يقدم الأخبار .
ومحمد ألمصروع ...وسجاد يلعبون طاولي
وعون...كاعد بصفهم يباوع عليهم شلون يلعبون .
وحمودي...هذا من بعد ألكرهه وألعدواه لان يعضني
صار حبيبي ...من يوم ما تزوجت نور .
كله ينام بحظني بليل لان أخاف أنام وحدي .
جان كاعد يمي..وكل شويه وأنطي حشوه من طاوةً ألكبة...لو أسويلة لكلوكة عجين ألتمن وياكلها
ألصراحة...هوايه أحب حمودي...وعون
لان من هم صغار عشت وياهم
من أجيت ألبيت ألسيد...عون عمره أقل ألسنتين
وحمودي...أجى على أيدي أني ربيته .
هنا وأسرسحوا خطار بيت ألسيد
وأجى عمهم ساجت ... وعمهم عزام ولدهم ،
باسم ...وجاسم ...وعصام ...وكمال ...وسلام .
وظلوا كاعدين فوك ألساعة ... وجيب ألجاي
ودي ألمي .
فتحوا موضوع ألزواج ويه محمد
هو يكللهم // مو هسه أزوج ...
أنطوني عطوه بس يتعدى شهر على دورة ألحول ألجديد ... لأمي ...والمرحوم عطأ
وأشوفلي بت حلال .
من طلعوا ...ألسيد كاله//ليش ما نخطبلك أزهار
بت عمنه ساجت ...من ثوبنه ومن عدنه وبينه
وهو أنكرص ...كال// أبو عطأ...موش حاجيتي كبل
بسالفتها...وكتلك المرأه ألتعرض نفسها عليه
ما تصبحلي مراة...لو يصغوها أليه من ذهب.
ألسيد جاوبه//بويه جانت صغيره...وعكلها صغير
ما تفرزن ألصح من ألغلط .
هو كاله// أبد ... أزهار برعة وصلفة
وعرضت نفسها عليه ...وبساعتها كتلك
وبلغتك بزله ألشيطان ألصارت.
ما أريد أرجع....وأغلط نفس ألغلط ألغلطته ويه ألمرحومه حياة ... وشالتني شهامتي عليها
لان بت عمي ...وعودين تحبني
وعشت وياها بضيم وتعب...من وره براعتها وصلافتها
ألسيد كاله// الله يرحمها ...أذكروا محاسن موتاكم
باجر أحنه هم نلحكها...ونريد وأحد يذكرنه بالخير
كميلة كالتله// خليهه عليه أني أخطبلك
بت بيت...وبشرط إلا حلوه...وتمرعد من جمالها
هو كاللها // أهم شي نظيفة ...وسمعتها خام
ألشكل ما يهمني ... بكد ألسمعة ألحلوه .
أنت تقرأ
حصاد المواسم
Chick-Litلكل زرع موسم لحصاده .. وعادة ما يحصد الزراع نتاج ما يزرعون .. ومواسم الحصاد هي مواسم اُنس وفرح وغبطة , إنها لحظات جني الثمار .. بعد جهد وتعب , وبعد عناء سواء طال الموسم أو قصر ..
