حصاد المواسم

ح ٥

#حصاد-ألمواسم
        👇
#فراقد
        👇
#ألحلقة((٥))
÷÷÷÷÷÷÷÷÷÷÷÷÷÷

هديل // دكت الباب ....
نور صاحت على ساجده //تعالي ساجده شوفي الباب منو بيها ؟؟ 
مااكدر اكوم اشرب بهدوله معسل بلكت يفتح صدرها

اجتي ساجدة بسرعة وتمسح ايدها بثوبها
من جهة رجليها ونزلت ثوبها من ملابسها الجوه

صاحت // منو بالباب ؟؟

جاوبتها صوت مريه ...

فتحتها وشويه ورجعت ساجده
بقت واكفة بالباب وكالت // نور يردوج بره

جاوبتها نور وهي تلتفت عليها وبيدها تشربني المعسل
// منو تريدني ؟؟كوليلها خلي تفوت

ردت عليها ساجدة وهي تباوع على باب الشارع
// والله مراه مااعرفها ... وياها ولد صغير
واكفة بالباب وتبجي

كتلها // تفضلي ماقبلت تفوت

كالت// ناديلي وحده من البنات أقبال ،أبتهال ،نور
عندي شغلة وياهن

كامت نور وهي تخلي الكلاص وماعون الجاي على الطبلة.....وطلعت للباب ،
واني بلكوة نزلت من ألقنفه ...ورحت امشي وراها
ماادري شبيه جسمي يوجعني وصدري بعد شويه مقبط

طلعت وأشوف نور .... وهاي المريه متحاظنات
وأثنينهن يبجن باب الشارع ،

وواكف ولد صغير أكبر من عندي
بس مااعرف شكد عمره ....
لابس دشداشه ... ونعال لاستيك ،
وشكلهم ولبسهم مو من أهل بغداد

تقدمت على نور وكفت قريب على باب الشارع

وحتى ساجدة أجتي وكفت ،

وهذا الولد يتلفت يباوع على الشارع

نور تبوس بهاي المراة بقوة وبوستها من كل وجهه
وأنوب رجعت حظنتها وتبجي

وأنوب دنكت على الولد سحبته وتبوس بي ،
وهو ما حظنها بقى منزل أيديه
مستحي من عدها

التفت نور على ساجدة كالتلها // بعد أخيتج
اركضي كعديلي أبتهال وأقبال ،
كليلهن ((أنتصار))وأكفه بالباب تريد تسلم عليجن

وهي المراه تكول// كليلهن مستعجلة تريد تمشي

أباوع ألمراه شكلها تعبانه ... ومتحجي بس تبجي
ولابسة حجاب بي دنبوس ازرك ... وعبايه
ومتقبل تفوت للبيت ،

والولد يكلها // يلا يمه تأخرنه
لازم أنرد للقرية قبل أذان المغرب

وهي بس تباوع بوجه نور وتشهك وتبجي
وتفر بعيونها وتباوع على البيت
وانوب شالت طرف الحجاب ومسحت عيونها
وبقت تمسح بخشمها

شافتني واكفة قريب على نور
كالتلي // تعاي خل أحبنج يبعد جبدي
أنت بت منو من ألبنات

ماافتهمت شنو كالت ...
نور مدت أيدها على جتفي وقدمتني
وكالت // سلمي على خالتج أنتصار ،
تصير اختي الجبيره!!!
متزوجة بالعرب صارلها هوايه ،