حصاد المواسم

ح ٤٤ ((ألجزء ألثاني ))

ألحلقة ألرابعة و ألأربعون ///من أحداث قصتي///

بعنوان /////حصاد ألمواسم

خطت بقلم ///فراقد حسن علي ///

----//////----//////----//////-------/////---------

ألحمد لله ألصبح كعدنه على خبر حلو
كنووش باقر يكول عليه// حالته شويه صايره زينه.

كميلة بس طلعت الشمس لكفت عبايتها وطارت
لبيت باسم...تكول//أروحن أفتهم من ندى أكثر
محمد يطلع ألجلمه من وره خشمه .

أني بس نايمه...لا اتحرك ولا أكوم
وجهالي بقوا يبجون بالاخص ليث فاك حلكه ويجوعر
عودين حشمت نسمه وكتلها//خاتونه الحلوه شيليلي ليث وزتي للحمام حت أغسله.

هي خطيه شالته وراحت تمشي كبلي...
أني كمت على كيفي متركده تركد
رحت للحمام غسلت للولد وهي نسمه رجعته...
وغيث بس بدلت ملابسه .

وبعدها كلشي ما سويت...رجعت تمددت بمكاني...
أني نايمه على ظهري وألعب بجهالي كاعدين يمي
حسيت روحي غركت...بسرعه ناديت على نهله
جانت كارصه بالمطبخ تفتر وتشتغل...
اجتني تركض كالت //هااا شمالج مخروعه
كتلها//الحكي عليه غركت بالحبابه...

أجتي ساعدتني بالكوه كمت...
شنو كامت تجيني لويات بنهايه بطني تعصر روحي غسلت وبدلت وطلعت
وهي خطية مغيره فراشي مخليتلي فراش جديد.

للعصر من أجى محمد من ألدوام أخذني للدكتوره
رجعت عليها نفسها ما غيرتها...سوتلي سونار
كالت//أكو نبض ضعيف بالجنين...
بس عندج خلل بمكان الجاره...
أمي ممنوع أتعبين نفسج وتشتغلين
اعتبري روحج رجلج مكسوره وأبقى نايمه بمكانج.

من رجعت كميلة كالت //هاي التابعه تمرد بالفرخ برحمج
ما ترتاح الا أطيحه .

محمد كاللها//وتالي إنا شسوي ويه ألتابعه دمها وشل...
بويه ما أريدن الجاهل موش تبطر وألعباس،،،
بس أخافن عليها لا يصير بيها شي...
وهاي الدكتوره مطنكره ما ترضى تنزله الها
تكول//حرام عليه وعليكم أنزله...نقتل روح
عبن بي نبض ضعيف .

كميلة كالتله//هسه أروحن أجيبن ألوكف ألها من عمتي أم ناهض وأردن بسرعه ما أطول .

راحت كميله وهي الروحه...

سألت محمد//شنو الوكف...؟؟؟؟

كالي//أكو أوادم تسمي وكف...واكو يسموا صيده
هذا طير لو عصفور تأكله الحية...وتغص بي
ترجع تزوعه...يأخذوا ألعرب ينظفوا ويبسوه
ويرقون عليه أيات خاصه لطرد التابعه
واكو يسموها أم الصبيان...ويختمون عليه
ويسوه كطع الهاي ألسوالف..وهذا الوكف يتغلف بجلد غزال...ويخيطونه على حزام من قماش او علك قماشه ثخين...وتتحزم بي ألمراه الحبله يثبت الجاهل عدها
يعني تكدرين تكولين هو كطع مال تابعه وسوالفها.

وما ردت كميلة لحد ماطاح علينه النجم وظلمت ألدنيا.
بس شنو مفحمه صايره نار كبره من ألأعصاب
وبس تنافخ...سألها عون //يمه شبيج شكو
كالتله//حل عني لو أذبن ظيم بني أدم براسك.