حصاد المواسم

ح ١٥ (( ألجزء ألثاني ))

ألحلقة ألخامسة عشر ///من أحداث قصتي///
        
بعنوان /////حصاد ألمواسم

خطت بقلم ///فراقد حسن علي ///

————//////———-//////————/////—

الله خله ابين اصابعنه فـــــــراغ
حتى ايد بايد من نمشي سوه
وخله بيه جروح ما الهن عـــلاج
وفقط بس عندك يامحبوبي الدوه
الناس تشتم الهوه حتى تعيش
وانه عكس الناس اشتمك هــوه
الگمر لوشافك يهز ايده يــــــدوخ
يگول بطران انه هم عندي ضـوه !!!!!!
————//////———-//////————/////—

هديل //نمت بهدوء بيت ألرجال أبو شعر ألمشيب
نومه مريحة...ياالله صارلي شكثر ما نايمه هيج نومة

كعدتني كميلة...والله ولا أريد أكعد هلكد ما نعسانة وتعبانة...بس لازم نروح للبيت
خلف ألله عليهم ألناس غربة وأستقبلونه بيتهم.

أم أزاد...دزتلي صينية ريوك بيد سجاد
حامستلي طماطة...وخبز...وتمر...وكلاص جاي
اباوع على الأكل...أحس روحي متقززه من عندة
أستغفر ألله حشه النعمة من وره ألشعر ألبطني
شكد أكل ولا اشبع .

الرجال صاح علية//أكلي ألتمر كدامي يلا بسرعة
وكافي تتعززين علينة .. لو أني من أبو حسين
الا أطكج بمراه ثانية وأحمسج حمس .

أنقهرت ولجلجت ألدمعه بعيني..
يا الله هذا شبي بس يرزل بية ...
أكلت ألتمر ونجبيت...أخاف هم يرجع يرزلني .

هسة أني كاعد أكل...ودمعتي بعيني
والرجال كلساع يرزلني...ما ألله هداني وسكتت
كتله//عمي أنت شلون طلعت ألما يتسمى من جسمي؟؟ أنت ألحاكم مالتهم ..؟؟؟!!!

هو ضحك من أعماق معدتة...وصار أحمر
كالي//لا مو ألحاكم مالتهم ...
بس من عشت ست أشهر وحدي بالجبل...لعبت وياهم طم خريزة .

شو عاط بيه//يلا خلصي ريوكج بساع...لا أهد ألزعطوط عليج .

محمد //وره ما تريكت هديل وألحمد لله وضعها أحسن
سلمنه على كل عائلة كاكا حمه...وتشكرنه من عدهم
وخلف الله عليهم من ساعدوني ... وعالجوها.

أمانة الله ألزلمة ما أخذ من عندي فلوس
ولا طلب شي كال//مساعدتي لزوجتك لوجه الله وبثواب ألنبي ألكريم .

بس كميلة...هي تبرعت بتراجيها ذهب صغار جانت لابستهن...نزعتهن وهدتهن لأم أزاد
ولزكتهن عليها بالكوة .

وأنا ما جنت شايل وياية هلكد فلوس ،
عندة بس جم ألف خليتهن بيد أزاد .

وألصراحة هنا أوضاعي ألمالية جانت تعبانه
بسبب مرض هديل...نهبتني نهيبه وركضت بيها
ما خليت لا ألسادة و لا ألشيوخ، ...ألحمد لله
من الله سخرلنه أبو أزاد...وفگلها كربتها
بقوة كرمة ورحمتة .

وهم أشترك بمصاريف ألبيت...
ومصاريف ألولد...علاوي  و باقر ودوامهم.

وأوضاع ألعراق هنا...شوية تخوف
قبل شهرين...بنص شهر ال ١٢ من ألسنة ألفاتت سنة ٩٨
أمريكا قصفت ألمعسكرات ألعراقية
وجان عدهم أهداف معينة قصفوها ،
أستمرة مدة ألقصف أربعة أيام...
بحجة عدم خضوع ألعراق...ومساعدته للجان  ألتفتيش ألمبعوثة من الأمم ألمتحدة...ألمختصة بالتفتيش على ألنووي...وأسلحة ألدمار ألشامل وتخزينها وصيانتها