حصاد المواسم

ح٤٩ (( ألجزء ألثاني ))

ألحلقة ألتاسعه و ألأربعون ///من أحداث قصتي///

بعنوان /////حصاد ألمواسم

خطت بقلم ///فراقد حسن علي ///

----//////----//////----//////-------/////---------

انا ابن البخت والسلف والديوان
وانا ابن المضيف الما طفت ناره
انا ابن العكال الما ركس ونهان
هذا عكال ابوي الدنيا تلوذ بكتاره....
٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪

أبويه حصر سجادكو حصرت ألجلب بالجامع
وهو كام يرعد على راس كميلة
بوده يفصخ العقد،،،ويخلص من هذا الزواج
أليوم قبل باجر.

أبويه ثاني يوم من ألفجر...
جهز روحة وبدل...وكميلة هم جاهزه وكاشخه
كعدوا سجادكو من نومته...كام يكمز
اخذوا كدامهم مثل الأسير
راح يلطم وجهه يطرد ألنعمة

أبويه من ألبارحة ألعصر طلع مبلغ أبو علاء
أليوم يمشون عليهم...وهم يحضرون روحهم
حتى يروحون للمحكمة يعقدون...

ما رجعوا أهلي هم والمغرب ...

وسجاد أجى مطنكر خشمه ما يكصه السيف...
بس سبح بسرعه ،، وبدل وطلع .

كعدت ويه كميلة وأفتهمت منهآ
بيت أبو علاء طايرين بروحتهم عليهم
ومحضريلهم هذاك الريوك المعدل
وبعد الريوك طالعين للمحكمة
رايح وياهم ابو علاء وأم نرجس

سألتها عن نرجس وكتلها//طلعت سلمت على سجاد

كالت//والله أجت وسلمت علينه وعليه
ألبت طلعت علينه بحجاب مرتب ولابسة عبايه
ومخليه كحله...وعطرها يخبل

هو بس ينافخ ورد عليها من ورة خشمة
وكاللها//هلا بيج انتي شلونج

حت اني دغيته بخاصرته ما عاين بوجهه
ولا شال عينه عليها.

من طلعنه هي البت لبست بوشيه وجفوف
وهو تسودن...ظل يردم على راسي.
ويكلي//شدعي على أبوها البركسها برأسي

وبالمحكمة ظل يركض بالمعاملة
وابد لاوصل ولا كعد يمها ولا يم أهلها.

وحولهم للمستشفى...اخذوا منهم دم
وكالولهم//بعدين رجعوا للمحكمة تلكون ألكتاب جدامكم.

وحت من جلبوا بينه على الغدا
البت وأهلها كعدوا ويانه على فد سفره
ونرجس كلش مرتبه بقت لابسة حجابها وجبتها
وهي خطيه من خلصنه غدانه خلت ماعون فواكه
مخصوص جدامه وهو يكلها//اشكرج ما اكل فاكهة
ويه الاكل لو بعده تسويلي عفونه بالمعدة.
خطية هي حسيتها تفشلت...وكالتله//براحتك.

كتلها//يمه ألعيار هذا أبنج سجادكو
موش يأكل الركي والبطيخ وباقي الفواكه بكشورهن
وأحنة بعدنه ما شايلين صينية ألغدة.

شاورتني تخاف بتول تسمع صارت جبيرة ونخاف عليها تتعلم شغلات مو زينه...من نريد نحجي بشغلات
جبيرة نكول// ابو خلف موجود...معناه أكو سالفه جبيرة