حصاد المواسم

ح ٣٨ (( ألجزء ألثاني ))

ألحلقة ألثامنة و ألثلاثون ///من أحداث قصتي///

بعنوان /////حصاد ألمواسم

خطت بقلم ///فراقد حسن علي ///

----//////----//////----//////-------/////---------

ألكتمان يرهق .... وألكلام لا يغير شيء ....
×××××××××××××××××××××××××××××

بهذيج ألظهرية التسمط بشهر ألسادس
وأجانه خبر وفاة جدة نهلة...
وهي نهله كلبت ألبيت علينا بالعياط...
وكميلة عيد وجابة ألعباس ألها...كابلتها وعياط ولطم

اني بسرعه لميت جنطة ملابس وغراض لغيث
وملابس أليه...وأخذنه محمد أني وكميلة وبتول
وكال العلاوي//جيب مرتك ،،، وفاطمة ورانه.

كميلة بالسياره ظلت تفر براسها...تريد كوله جديدة
تلاجي بيها ألنسوان من تفوت لبيت أنتصار
كالت لمحمد //ما تخملي رأسك وترتبلي كوله
ثال راسي...وفكري تاه مني....

جاوبها//أم عطأ كولي يالله...ألمراه جبيرة...
وهذا حد يومها...لا تعيطن ولا تلطمن...
سلمن على ألنسوان واكعدن...

كالتله//ياااا عودين صدك تحجي...أذا ما دبجت
وذبيت فلك بالعزة...غير يشهرني ويكولن جايه تشمت

محمد هز أيده وكال // هو ألموت هم بي شماتة
أستغفر الله شو كلنا نغرك بهذا البحر....
وكل عين مفتحه تغمض...بس عين الكريم تدوم .

صدك لحد ما وصلنا...وكميلة حايره شتكول
من وصلنا لشارعهم أنطيت غيث بيد محمد...
وتوزرت بشيله كميلة...ودخلت وياها ألاجي
من ألشارع عطنه يبوووو ما يبووووو
من قوة الصريخ،،،والعياط يمكن فطرنا حياطين بيتهم

وعاطت أم عطأ //لفوها بزري يا مِلكة ألنسوان ...
لو نعلوا أبوها تنعل ألشيطان...
وكامت تدبج بنص ألنسوان...خاطتهن خوط

وأني هم حافظة كوله ذبيتها...وكمت أدبج ويه كميلة
//تصلي ولايكة الشيلة على مكفاها ...
كلي يالضيعتهه وين تلكاها ...

لعبنه فلك بين ألنسوان...
كميلة معروفه بين أل هاشم هي ألتلاجي وهي التكول
ولو طبت بنص ألعزة تكلبة كلاب...

بعد ما كعدنه كدام بنات ألمرحومة...
وكدام أنتصار هي جنتها الوحيده...
ونعت أم عطأ هذيج النعاوي ألتفلش راس ألكلب...

أني صدك أنقهرت على العجوز. ..
بقتلي ذكره منها الله يرحمها أنطتني مكحله،،وقطعه قماش،،على كولتها صوغة من بيت الله...
وأجتني من جبت غيث.

صح من أجيناها أني ونور بهذيج ألسنه الكشرة
من شردنه من بغداد وطردتنه
بس بمرور ألوكت...من تزوجت نور سامحتها،،،
وعادي صارت طبتها وره زواجها على بيت أختها أنتصار
وأني ما حقدت ولا ضجت منها...الله يرحمها ويغفر ألها.

كمت سلمت على كل ألنسوان...أكثرهن يعرفني
بنت أبو عطأ...ومرت محمد...
وكميلة ما قصرت خوش علت من شأني
تكول للنسوان ألما يعرفني //هاي بنتي أم غيث...
ومرت حماي محمد...وهاي بتها العود بتول...