ألحلقة ألثالثة و ألأربعون ///من أحداث قصتي///
بعنوان /////حصاد ألمواسم
خطت بقلم ///فراقد حسن علي ///
----//////----//////----//////-------/////---------
وشنو ذنبي ؟
عايشلي بحلم تايه
لا لاگيلي عين تنـام
ولا لاگي اليفسرني
××××××××××××××××××××××
وبليل ويجينه جليل ((جعيوي )) وأخوه ابو علاء
لضرب كنووش...واخوهم الجبير أبو أحمد
وياهم عمهم شيخ فخذهم....
وجيب ألجاي...و ودي ألمي
وأنت تفضل...وأنت أحجي
وأبوية ومحمد وألولد كاعدين يمهم ...
أبو علاء كال لأبوية//أبو عطأ أعرفنك زلمة خايف الله
وكليبك ملجوم وفاكد صبي...رايد أوليدي علاء
من رحمة الله...وفزعتك للخوة.
أبويه كاله//شنهي سالفة فهمني.
عمهم شيخ الفخذ مالتهم كال//أبو عطأ خويه
تعنينه نأخذ عطوة من عمي أبو ناهض
أنتم وأحنه محتاجين وكت لنعاين تالي ألصبي
شو أبو رعد جاسم طردنه وكال //كل عطوة مالكم يمنه
كريم يموت ،،، علاء يموت...دم بدم
موش أوليدي أطمنة بالنجف وأبنكم الهتلي يبقى عايش
ويشتم هوا الدنيا.
كريم يعيش،،،علاء يعيش وبهذاك ألوكت أفصلكم مربع.
عبن أبنكم هتلي وسايب،،،بركبته أثنين حريم
وعنده ولد،،،ومخلي راسه براس زعطوط ...
وهل سكنه بفرارة ألموت .
أبويه كاله//جاسم عوفه عليه...أنا أضمنه الك
بس ما أكدر أضمن كل أل هاشم يا ستار اذا توفي الصبي .
شو أبو علاء محمد يسولفلي،،،يكول //طفر من مكانه
ونزع عكاله وشماغه وخلاهن كدام أبويه
وكايله //داخل أبختك دخيل دم...أريدن سالفه أوليدي علاء أنت تحلها...مالي حيل لذبحة الكلب جديده
وأنا فاكد أثنين عرسان وأحد راح بالتفجير
والثاني أنذبح من وره أسمه.
وما ظل أليه بس هذا الاغم علاء
وصبي بعده يحبي ....
محمد يكول //كسر خاطري من كام يبجي كدامنه
وفاضل أنحرج من عنده ومن باقي الازلام...
والموقف أبد موش سهل
عاد كام عليه ورجع شماغه وعكاله على راسه
وكاله //عيوني أشلعهن ألك ولا يهونون الحاضرين
وأحد من أولادي أفدي لدم وليدك علاء ،،ألله لا يكولها أذا توفى كريم أبن ناهض...
وأن عاش من هسه أنا وأكف وياك ونص الفصل أطيحه ألك.
هو أبو علاء بايس أبويه على راسه...ومتشكر من عنده
وكايله//بس تنحل سالفه علاء هديتك تجيك للباب.
أبويه كايله //بس اذكر أوليدي عطأ بثواب سوره الفاتحه...هاي تسوى عندي الدنيا ومابيها .
من طلعوا الرياجيل...محمد وألولد كبوا على أبويه
شلون هيج يسوي...بعتبار اسم الله اذا مات كنووش
علاء بعد ماعليه شي لان أبويه تكفل بسالفته
وجاسم ياخذ ثار كنووش ويكتل وأحد من ولدنا.
أنت تقرأ
حصاد المواسم
Chick-Litلكل زرع موسم لحصاده .. وعادة ما يحصد الزراع نتاج ما يزرعون .. ومواسم الحصاد هي مواسم اُنس وفرح وغبطة , إنها لحظات جني الثمار .. بعد جهد وتعب , وبعد عناء سواء طال الموسم أو قصر ..
