حصاد المواسم

ح ٥٣ (( الجزء الثاني ))

ألحلقة ألثالثة و ألخمسون ///من أحداث قصتي///

بعنوان /////حصاد ألمواسم

خطت بقلم ///فراقد حسن علي ///

----//////----//////----//////-------/////---------

ملاحظة ((ما مراجعه ألحلقة غلسوا على السحك 😅))

وصدك سجاد استسلم لكميلة
لان تلح وتاكل رأسه اذا ما يروح وياها
وعلى كلامها من غبشه طلعوا لسبع المحاويل
علي أبن ألحسين صكار الجنون فدوة لاسمة ....

أني مالي خلك الروحي...وابنهم ابو صماخ بس يبجي
شكد يصرخ...من ألفجر يلج ويبجي بوجع
أمه حارت وياه خطيه وهي بالكوة تتحرك متوجعه
من ضيم الخياطات...بدلت ملابسه...رضعته...كمطته..
مايفيد وياه...أني شلته وبقيت افتر بي ما يسكت

حمودي كعد ضايج من وراه هلكد ما يصرخ ويبجي
كال//هااا فصختن ايد الولد وصركعتنه.

كتله //لا ما ممتون أمه تعرف وهي متنته وكمطته

صفن وكالي//أكلج عاينتي خاف متحاصر وامه
ما تعرفله.

اني هم فرشت وكعدت بنص الهول وفتحت أكماطة
يالله أنصدمت ألجاهل قلاقيله اكبر من رأسه
ولون الجلد بي زراك.

حمودي صاح//هاي منو ضارب الولد ومسكطه

شلته واخذته لغرفه كميلة شوفته لنرجس
كتلها//هاي من شوكت الولد خص.... هيج مورمه

كالت//أمس جان بيهن ورم قليل...
وابوه عاينه كال// عادي لان بعده فرخ أنفاس
بس اليوم زاد الورم...وما جان اكو هذا الزراك

كلت الحمودي خابر على باقر خلي يجي ويعوف دوامه
الولد راح يسكط متأكده حالته خطره

حمودي خابر على باقر وشكد حجه وياه
بس باقر ما يكدر يجي الا للعصر ...
اخذت تلفون من حمودي وحاجيت باقر
كتله //اذا ما تجي تعاينه هسه اجيبه واجيك للمستشفى الولد بي كنكري راح يأكل خص... تعال لحك عليه...
هو بس يضحك على عصبيتي عليه
وأنوب من كتله كنكري طك من الضحك
كالي//ساعه واجي بس يجي الدكتور بديلي.

حمودي أنوب سودني وسودن نرجس
وما يقبل نشيل ابو صماخ ونحركة...
يكول //هذا بي شي خطر وهل ورم وازرك...
ويجوز الحركة تأزم وضعه.

بين ما أجى باقر الا أحنه زوعنه العافية...
بوجه اجى لغرفة كميلة على صريخ وبجي الجاهل
بس شافه وفحصه خابر على علاوي كاله //هسه تطلع من دوامك ابن سجاد عنده قيله مائية وبعد خلل ما أعرفه شنو بالضبط...لأزم اخذه للمستشفى .

نرجس شبعت بجي عليه...
باقر كال ألنهله//حضري روحج تمشين وياي
وهديل وفطم عينهن على أمه وعلى ألجهال.

وصدك بس وصل علاوي اخذ باقر وحمودي ونهلة
للمستشفى والجهال على فد صرخه.

وأنوب أجاني ضيم رضاوي...هذا جوعي
اذا يجوع ويفتح حلكه بعد ما يسده
كلت الفطم //أنت عليج بس هذا الهتر
وأني عليه الباقي.