#حصاد-ألمواسم
👇
#فراقد
👇
#ألحلقة((٣٧))
×××××××××××××××××××××
هديل // وأستمرت حياتي بين ألبيت والتلفزيون ...
وروحاتي ألقليلة على سهاد
بس جم مره رحت على نور ...
هي زعلت ...وبعد ما أجتي لبيت ألسيد
لان محمد ضربني كدامها ...وكدام حسيون
لحد مايوم ألسيد بنفسة ...أخذ كميلة
وراحلها لبيتهم ...وطيب خاطرها وراضاها
وهي باقية تبجي وكايلة للسيد //هديل بنتي
وأبو زيد من شافني محموسة عليها
كالي //جيبيها يمج ...
بس أني ما أريد أكسر بكلمتك..وخليتها عدكم أمانة ومحمد كدامي وضربها...ورايه شيسوي بيها
وكميلة حالفتلها مية يمين ...محمد ماله دخل بيه
ولان غلطت وفشرت ...ضربني
عاد وراها بيومين...
من روحت ألسيد وكميلة عليها ...أجتي علينه ...
بس أباوع عليها مو على طبيعتها ...
وكلش ضايجة...دمعتها طاكة بعينها ...
بس ماحجت شي ...وجابت وياها زيد .
شوية وراحت .
يمكن أقل الاسبوع ...وصارت مشكلة شكبرها وشكدها
جنت كاعدة ألظهرية بالمطبخ أعجن
ومخلية جدري على ألنار ... أحضر للفطور
الحمد لله ألجو بارد ...وعلينه نهاية شهر شباط
ما أحس بعطش من أخبز قبل الفطور ..
لان أخبز وجبتين ... خبز أبيض وخبز عروك
والله بقيت أفر براسي ...شسوي فطور
عاد قررت أسوي مركة بتيته ...وتمن
وحلاوة شعريه ...عندي شويه شعريه باقية
وأسوي طاوة حنيني ...لازم أكو تمر بالفطور
وبحت ...عندي دگة نكعتها من ألصبح
وفد شوية كميلة تحلب الهوايش ...أخذلي دولكة حليب وأطبخها بيها ...
وعندي طرشي شتوي ...
كميلة جبست بالبستوكة ...شلغم ،وشونذر ،ولهانه
وقرانبيط ،وجزر ..على شوية شوية يعني ألباقي عدنه من المخضر ...هسه أنتي جبستي خلف الله عليج
تخلين بيها كيلو فلفل حار ليش ...؟؟؟
وأحدنه ياكله لكمة طرشي ...يطفر للسكف ...
ويرجع للكاع من كد الحروره .
وهي كميلة كاعدة بصفي..شاعلة بريمز النفط (ألببور )
ومخلية علية جدر فافون صغير..وكاعدة تسمط بشوش
محمد ألمصروع ذبحلنه ثلاث بشوش ...كميلة تريد تسويهن ثواب .
علاوي ..وباقر بالمدرسة ...أثنينهم نفس الدوام
يرحون سوية ...ويرجعون سوية
بس سجاد دوامة يختلف عنهم ...
مثلا دوامهم من يصير صبحي...سجاد يصير دوامة عصري ...وبالعكس
وسجاد جان يبدل ...يريد يروح للمدرسة
دوامة ساعة ب ١٢ ألظهر ...
حتى من هو يروح ...يرجعون علاوي وباقر
وألهتليه..عون وحمودي..يلعبون مصارعة بالحوش
والله أنشلع كلبي...
من ألصبح بس كعدت غسلت الحوش ...
ورديت مسحته بيدي بوصلة ألمسح ...
ينكسر ظهري لحد ما انظفه ...اطلعه يلج من النظافة
وهذوله الهتلية يوسخونه
أنت تقرأ
حصاد المواسم
ChickLitلكل زرع موسم لحصاده .. وعادة ما يحصد الزراع نتاج ما يزرعون .. ومواسم الحصاد هي مواسم اُنس وفرح وغبطة , إنها لحظات جني الثمار .. بعد جهد وتعب , وبعد عناء سواء طال الموسم أو قصر ..
