حصاد المواسم

ح ٣٧ (( ألجزء ألثاني ))

ألحلقة ألسابعة و ألثلاثون ///من أحداث قصتي///

بعنوان /////حصاد ألمواسم

خطت بقلم ///فراقد حسن علي ///

----//////----//////----//////-------/////---------

لا تسقني ماء الحياة بذلة ،،،، بل اسقني بالعز ّ كأس الحنظل.....
××××××××××××××××××××××××××××

صلوات على ألنبي...صبحنه أني ونهله وفاطمة
كلنا حوامل...

أني أليه ثلاث أشهر...
ونهله نفس وكت حبالاتي بس أكو فرق بالأيام كلش قليل...وباطله هستوها بشرت كميلة هي حبلت.

حتى كميلة ضحكت وكالت//صدك لو كالوا ألحبالة غيرة...هاي جانت أمي عواطف الله يرحمها...
ونسوان عمامي يحبلن سويه .

ما الله هداني وسكتت...لا ذبيتلي سالفه خليتهن يموتن من ألضحك...كتلها//يمه الوكت شته...والجو بارد
والواحد يدور دفو...ويصيرله واهس يكثر الجقات
يمه ألشته يخلي ألبشر والبزازين تشبط بي .

هي ضحكت من خاطرها...وخلت شيلتها على وجهه
وكالت//من دهر فر سوالفج.

كتلها //يمه أنتي هم عياره مو اول بارحه غسلتي
ويه طكت البريج...حتى لا يكشفوج الولد ويسولج زفه
عليج حلال وعلينه حرام...

عاطت//ولج المسودنه فضحيني وشهريني .
وبعدين أبوج سودة عليه صار بي جفاف
كضن أشهر محروم مني من وره هاي النخله ألزعلت...
وأنوب انتي عرستي وولدتي بعد رضاتها...
وأنوب هل علينه عاشور...
وأجتنه سالفه سجاد صفح دوهنت عكله...
وهسه أنتي نافستني على جقة أول أمس .

كتلها//يمه هذن سوالفج مو عليه
أبوي زلمه فقير...أنتي تتحشكين وتشمرين روحج بحظنة...وبس يجي علاوي من ألدوام أخليج بحلكه...
الا أخليهم أليوم يسويلج زفه...وينصبوج عروس
لصينيه عرس القاسم .

تحلفت بيه وكالت//وروح عطأ...بس تفكين حلكج
أزوج محمد وأخلي يحمس كلبج حمس.

كتلها//يمه ألمدهربة ما تخوفيني...
ومحمد يحبني وما يتزوج عليه .

صمت أصابع أيدها كدامي تتوعدلي وكالت//أصبرلي
ألا ازفنه على غيرج وعينج تشوف...

كتلها متحديتها//محمد ما يتزوج عليه ويحبني

كالت//بس الشيطان يورطج وتفكين حلكج...
من عين طكت ألفجر أعتبري مثني عليج.

يمه شفتها تحجي صدك....مو شغلت تخوفني
سكتت عنها.

ألعصر رجعت اتوسل بيها...
سامعين بدرب ألجلب على ألكصاب...
أني ما أكدر أعيش بدون كميلة أطك واموت من دونها
اذا يوم تغيب عن ألبيت أحسه يريد ياكلني.

توسلت بيها ادبرلي شاميه حمره
كالت//ولج أنتي مسودنه منين هسه أدبرلج شاميه حمره...

كتلها//طعمها طك بلهاتي أريدها لو من جوة الكاع