حصاد المواسم

ح ١٩ (( ألجزء ألثاني ))

ألحلقة ألتاسعة عشر ///من أحداث قصتي///

بعنوان /////حصاد ألمواسم

خطت بقلم ///فراقد حسن علي ///

-------/////------------/////-----------//////---

مو كل اليحب آيعيش فرحان ..
اكو واحد يحب بس هو يائس
واكو لمن يحب آيصارع الموت ..
ميهمه يصارع ألف فارس
ينشدونه آعله قيس وليلى كل يوم ..
أشو محد ذكر بالعشــگ عابس

--------////--------////----------///////-------

(( بارت صغير سحور للحبايب 😁 ))

هنا ودخلنة بسنة ال ٢٠٠١

أني نفسي ... لا سمنت ولا ضعفت
وصار عمري ٢١ سنة ...

وألمصروع ٢٩ سنة ...

ومتسودن من ورة ألحنتوش...مره يشتغل مابي شي وعشرة مرات عاطل...

ولأزم غصباً علية أتحمل سوادينة من أطگ على راسي همزين الله أخذت أسلوب ألخرس ولا جان دهربتلي كلمة...وهو خوش يجفص بمصاريني ويزوعني العافيه.

بتول كامت تزحف...وصلوت حلوة وشگرة

ونسمة لا تمشي ... ومدهربة جنها كميلة
تموت على حمودي لأن يلاعبها .

وباقر ...صدگ سمع كلام أبوية وعاف فاطمة
لحد ما تجيب يلا يطلكها .

وألحمد لله كاعد يداوم بالكلية...
ويداوم بشغلة بالمركز ألصحي...
مأجر بيت هناك بالموصل وهو وجم ولد وياه...هم طلاب يداومون وياه بالكلية...كلهم يتشاركون بالمصرف ودفع الإيجار .

وألحمد لله علاوي...أموره حلوة
بعد ما يروح لبغداد...يمكن تسرح من ألجيش .

وصديقة المواعدة بشغل...لأبوة يشتغل هنا بمديرية الزراعة والرأي بمحافظة بابل...صدگ وياه وماجذب علية...وصلوات تعيين بالمدرية وصار موظف
ألصبح يروح للمديرية...والعصر يروح لورشة ألنجارة

وحمودي حبيبي هسه صلوات نجح من ألصف ألرابع الابتدائي وراح للخامس.

عون حبيبي نجح من ((بكه لوري ))مال سادس ابتدائي
وراح للمتوسطة .

وسجاد  صلوات هم نجح من ((بگه لوري)) مال صف السادس علمي...وراح للكلية مال بابل
وقدم كلية مال مهندسين...يريد يصير مهندس مال حواسيب...ما أدري كهربائيات.

وهنا كام يفيگ...كلة يلبس أخر موديل وأخير كشخة
ويحلب بلفلوس من كميلة حلب.

نهلة صلوات على ألنبي بداية شهر ألواحد
طلعت حبلة .

هي  من قبل عدها ألحبابة تتخربط
وغابة عليها شهرين...حسبالها مثل كل مره متخربطة
بس من كامت تزوع ألصبح ...
وتتسودن من فراش علاوي...وتصيرلهم عركة بليل
ونسمع عياطهم...وصياحهم علمود ألجقة ...
ونسمعها تبجي...تكول العلاوي//والله ما أعرف شبية
أضوج من ريحة ألجگاير ألبيك تلعب روحي.