حصاد المواسم

ح ٣٤ ((ألجزء ألثاني ))

ألحلقة ألرابعة والثلاثون///من أحداث قصتي///

بعنوان /////حصاد ألمواسم

خطت بقلم ///فراقد حسن علي ///

----//////----//////----//////-------/////---------

ما أزعل أذا تأخرتي عالموعد

حلات ألعاشك يتاني

خل يبطي ألزعل بينا

نرد مثل ألكصيبه نصير

وأحد شابك ألثاني
××××××××××××××××××××

علاوي كام يتحرمص على نهله ...

وهي خوش تفت بي...تلبس وتكشخ وتتمكيج
وأنوب صايره ناعمه...ومالها صوت
وكلش تتعاير...ألنخله نخلتي وأعرفها كلش زين

وكميلة فد وحده عياره...وأكفتله عظم بالزردوم
وألعباس أني أحجي ألصدك ...
هي تسوي هيج مو محبتة بنخلة لو بباطلة
بس تخاف لا ألولد يعرفون غيرهن ويتزوجون عليهن
من باب تكول//ألشين التعرفه أحسن من ألزين ألما تعرفه...ومن باب ثاني//ما تريد هوسة وطلايب ومشاكل
تخاف على ألولد...ومن باب ثالث//ما تريد وحدة تشمت بيها وتكول عليها ما تعرف تصرف وتسيطر على عايلة بيتها...وهي خوش عدها خطه تكول// أحسن شي أكسر وأجبر يلا تمشي سفينة ألبيت.

أبوية فقير ما يدخل بهاي ألسوالف الشرانيه
بس بوكت ألسالفة ألصدك خوش يحلها
وما يرضه بالعوجه.

علاوي محاجي كايله//أريدن مرتي وجهالي يردون ألغرفتي...خوش مجاوبه وكايلة//هذيج مريتك روح تعذر منها وطيب خاطرها...وردها لغرفتك .

هو بقى ألعصرية كلها يحوس...
كميلة عرفته...حتى أحنه كلنا نكدنه عليه
لحك نخله للحمام راحت تسبح جهالها
وبقى وأكف باب ألحمام ويسولف ويه ألجهال
بس هو يحاجيهم علمود يسمع نخله...

هي ولا جنها تسمعه...عافته وأكف بالحوش
وجابت ألجهال وأجت تمشي وتتكلب كدامه
جنها بطه محصوره بيضه ومتغير مكان عشها...
وثوبها لونه خرائي ما أدري حني ويلالي لحد ركبها أتكها كصير...طالعه جنها عكركه بأخير لحظاتها قبل لا يجعصها تاير البايسكل .

لليل وعليوي يلوب...ألجهال شبعوا مشتره بهذا أليوم
كلساع وراح جاب علاكه حلويات...

أني مجطولة على صفحه بالهول أحس بطني توجعني..
مو طبيعه نفس كل يوم ...

محمد كاعد يمي بالهول هو وعون يلعبون طاولي
ويضحكون على علاوي...مو يجيب علاكه الحلويات يخليها يمي لو يم كميلة يكول//وزعنها على الجهال
محمد يضحك ويكول//أشمري اليه حصه من علاكه حلال ألمشاكل .

فاطمة كملت ألعشا...والكل أكل بالعافيه
ونخله فرت الجاي على الكل ..
من كعدنه نكرز حب وره ألعشا...علاوي هنا بعد أنحصر
كال //بوية من رخصتك أريدن مريتي وجهالي يردون ألغرفتي.