ألحلقة ألثالثة والثلاثون///من أحداث قصتي///
بعنوان /////حصاد ألمواسم
خطت بقلم ///فراقد حسن علي ///
----//////----//////----//////-------/////---------
يا إبن أمي ألاخو مو چلمه تنگال...
يحط روحه درع ويناطح أجبال ..
من يعدل حملها ألروح لو مال ...
تعال وشوف حالي بهالزمن حال.
×××××××××××××××××××××××
من رجعت لبيت أبويه...بعد ولادة نور بأسبوع
والحمد لله كامت بسلامه...وبتها فردوس زينه
تفاجأت بعلاوي وجهه ثكيل عليه...وما يرد سلامي
وكالي//حرامات ما غزر بيج ملح ألخوه
هيج كلبج ينطيج أدعين عليه...وتشيشين مريتي عليه...وتهجمين بيتي .
يمه تفاجأت بكلامة...لحكته لغرفتنه
وكتله//تعال هنا علاوي لا تشمر بالحجي وتعوفني وتمشي...منو غيرك عليه...وكالك هذا ألحجي الباطل
كالي //سألي نفسج...ودفعني على كيفه من جتفي
وكالي //اريد أرتاح...
أني طلعت من غرفته ميته من ألقهر...
دموعي هلت على وجهي...كلش أنهضمت
رحت بوجهي على كميلة...كاعدة جوة ألتوثه
تفلي بالبنات وتشوف شعرهن...تخاف لا يتوسخن
لان يلعبن بالمراح...ومرات يلعبن ويه بنات ألجيران
صلوات شعرهن ثخين ونخاف لا يتوسخ ويكملن.
كتلها//يمه كومي حاجي علاوي وأفتهمي منه عليش
زعلان عليه.
كالت//شمالج أجيتي شايشه عليه...شكو
سولفتلها كل ألسالفة...
هي ضاجت وكالت //وألعباس مالي خلك للمشاكل...
بس لو عرف شبي علاوي شايش علينه جان أرتاحيت.
كامت من مكانها وكالت //تعاي مشطي للبنات
بين ما أعاين سالفه عليوي شنهي.
أني لا كعدت أمشط للبنات ولا أبد...
لحكت كميلة لغرفته علاوي...هي كبل دفعت الباب وفاتت عليه...وراحت كعدت يمه على ألقريولة...
هو جان مجطول...كعد وكاللها//خير يمه أكو شي .
هي كالتله//يمه شمالك متغير علينه
وشايش على مريتك...
ومتغير على أخيتك...
ولا تحاجيني...ولا تكعد يم أبوك واخوانك
شعندك باصرني وكلي هذا ألبيه
هو بس كاللها//ماكو شي .
عاطت بي //لا اكو شي...تراني ساكته عنك عبن حاشمه كدرك وأكولن أبني العود ... وصبي عيني
يمه شنهي معناها من تشيش على مريتك
وهي جمارة...من تنضم بالكلب ألعليل تشفي...
وهي صادكه وياك بكلشي...وقنوعه...
ورضايه بعيشتها وياك...وأنت هاملها ومطيح حظها ..
هو انكرص وكال//يمه لا دافعيلها وأنتي كلشي ما تعرفين...لو لأن بت أختج أدافعيلها
عاطت بي كميلة//لا ألحك ينكال،،،وهي صدك جماره
وخلها بالك هي موش بت أختي...من دشت ألهذا البيت اصبحت بنتي...ومرتك وأم جهالك...وجودها هنا معناه ركن من أركان هذا ألبيت.
أنت تقرأ
حصاد المواسم
Literatura Femininaلكل زرع موسم لحصاده .. وعادة ما يحصد الزراع نتاج ما يزرعون .. ومواسم الحصاد هي مواسم اُنس وفرح وغبطة , إنها لحظات جني الثمار .. بعد جهد وتعب , وبعد عناء سواء طال الموسم أو قصر ..
