لكل زرع موسم لحصاده .. وعادة ما يحصد الزراع نتاج ما يزرعون .. ومواسم الحصاد هي مواسم اُنس وفرح وغبطة ,
إنها لحظات جني الثمار .. بعد جهد وتعب ,
وبعد عناء سواء طال الموسم أو قصر ..
والدنيا شته ...بارده تكص العظم من البروده ومحمد يزخ عرك ... ويشكي من كلياته ورجليه تورم ... حتى جفوف أيده تورم وبالذات من يكعد الصبح حتى عيونه منفوخة ...
آخذة ألسيد للطبيب ...وبعد مارجعوا السيد وجهه معقوج ...
الطبيب محول محمد ... لمدينه الطب بغداد يكله // أشك عندك خلل بعمل وظائف الكلى
السيد ثاني يوم من الفجر ... أخذ محمد ... وياهم أبن عمهم عصام وراحوا لبغداد يشوفن سالفة كليات محمد
و أني هنا .... دخلت بعمر ال ١٢ سنه وجسمي بده يكبر ويتغير ... وحتى مزاجي وتفكيري يتغير ....
ما أعرف ليش على غفله أضوج وأختنك...وأبقى بس أبجي ... وبسرعة أضوج .... وأصير اعصاب ومااتحمل أصغر كلمة .... وما أقبل أحد يصخرني
وعلاوي شاد ويايه ... بزعني بعيشتي
أني بالبيت مالبس حجاب ... شعري طلع بس قصير ... شويه أطول من شعر الولد
وهو علاوي يكلي // إلا تلبسين حجاب
أكوله// من ألبسه يبقى راسي يهرشني
وهو ولا يسمع مني ... كلساع كافخني
هو شايف نفسه عليه ... عودين لان أكبر من عمري بثلاث سنوات .... ونافخ ريشاته على راسي.
أنوب كميلة سوتلي عبايه على طولي ... والله حتى ما أعرف أمشي بيها ... بس لازم من أطلع ...واروح لبيت سهاد ... ألبسها غصبن عليه ... هي والحجاب جواها .
أخذت حمودي وعون ويايه العصر ... ورحت لبيت سهاد ....
بطلنه مانلعب مثل قبل...بيت أبو بيوت لو لعابات نكعد نسولف ونشاقه..وننصب على هاي...وعلى هذيج والغيبة ....والنميمة نحملها بكونيه
وهن يشتغلن ويسولفن ... لو يبرمن قماش للبسط ... يعني الملابس التعبانه ... المايردوها يكصكصنها بشكل شرايط طويله ..وأنوب يبرمنها بمبرم خشب ...ويسونها على شكل كورات جبيره ملونه ...ومبرومة ...وبعدين يوديها أبوهن للحايك يسوون بساط مال قماش ...ويصير شكد حلو بساط طويل .... وكله الوان حلوه
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
