حصاد المواسم

ح ٢١ (( ألجزء ألثاني ))

ألحلقة ألواحده وألعشرون///من أحداث قصتي///

بعنوان /////حصاد ألمواسم

خطت بقلم ///فراقد حسن علي ///
----//////----//////----/////------------////----

لـــو تـــــــــدري بغـــــيــابـــك ياهـــــو ويــاي
الحـزن لــمـــلــــم اخــوتـــــه وكَــعــد يمّــي

----//////----//////----/////-----////-------//////-----'

هديل //من سافر محمد تكومت ونمت بالفراش على فراكة...أون علية ليل ونهار.

وبتول نحسه...ما ترهم بس علية من تريد تنام
حتى نهلة ،، وكميلة عجزن منها ما تنام عدهن
وهي لاطشة بيه...وأني أحس روحي تريد تطلع مني
مجطولة ونايمة ليل نهار...وشاعلة بيه صخونة ألقهر وألفراك....

وصلوات هي مو صغيرة...عمرها هنا أربع سنوات وتفتهم ألحجي...وتفتهم من أسولف وياها
أكلها//يمه أني مريضه...روحي نامي بحظن يمه كميلة ما ترضه...

وتبقى تلج وتبجي على محمد...تفگدة تصيحلة بابا
وتصيح لأبوية فاضل...بوية ،، وية لفظة ألولد
أنوب ترجع تذكرني...وأني اصلا ما ناسية ...
وأرجع أون من جديد .

ألبيت صار كل ثگلة على نهلة...
أمانة الله هي ما مقصرة ويه وأحد...خادمة ألكل
بس هم تعبت...وصلوات هستوها حبلت
وصارلها يمكن بست أشهر من فطمت رقية.

وصلوات بتها رقية هم مو صغيرة...راح تقبط ثلاث سنوات...أجتي بشهر ألعاشر سنة ٢٠٠١ .

شنو علاوي...أستغفر الله لو ما يستحي من رب ألعالمين
يمكن يسويها تربة ويصلي عليها...هلكد ما يحبها ومدللها

والأمانة بنات باقر...أمهن كميلة مخليتهن بلة كلبها
((نسمة))قبطت الخمس سنوات...ودخلت بسنة السادسة
هي مواليد ٩٨ .

و((مسك))هم صلوات قبطت ثلاث سنوات ...
ودخلت بسنة ألرابعة...لأن اجت بنهاية سنة ال ٢٠٠٠
بس سجلوها بالجنسية على سنة ٢٠٠١ .

والله محد مقصر وياهن بالبيت أمدللات
أبوية يموت عليهن ،وهن يصحلة بوية .

بس نسمة ،، وبتول عرگ بيناتهن ناس تملش ناس
ورقية ،، ومسك هم عرك وناس تملش ناس
ساعة أليصاحبن ويصيرن شحلاتهن خوات
وساعة أليتكافشن وتعال يمن يفكهن.

أني هنا مالي خلك للثوب ألساترني...بس مجطولة ونايمة وأون...وألف فكرة سودة تجي براسي
وبيوم مارجع قايد وكالنه//صديقة مبلغة موصل محمد وألولد السوريه باأمان...هلكثر بجيت...
والله أخافن عليه...هو ألهوه أليصعد وينزل بريتي
أني من دون محمد أطك وأموت .

بتول بوكت ألعصر المتأخر...بطكت صفار ألشمس
تون فوك راسي...تريد تروح تشتري
وهي تريدلها حجة حتى تبجي على محمد فاكدتة
صارلة أسبوع من راح بسلامة...

وأني جنت وأكفة أغسل أستكاين ألجاي...
وأريد أكضي وكت...وهم أساعد نهلة...خطية تتنسى ونساوتها براسها