ألحلقة ألسابعة ///من أحداث قصتي///
بعنوان /////حصاد ألمواسم
خطت بقلم ///فراقد حسن علي ///
××××××××××××××××××××××××××
انا عيوني تسولف عالغرام ويّــاك
ومن عيوني أعرفك تفتهم قصدي
ما أحب الوكت لو خلص بلــيّاك
بالقرأن محد حبك بگـــــدي
وإذا تنساني صدگ آني ما آنساك
لأنْ غيرك محب بالدنيا ماعندي .
××××××××××××××××××××××××
أيامي ألمرت...بعد ما خلصت من سالفة طلاك تك أنعال شكد ما أحجي...وأكول عنها حلوه قليل بحقها
محمد دللني دلال ما صاير ...
شنو يطلعني للسوك ... للزياره
يوديني ألبيت أنتصار ... ياخذني ألبيت طوعة
و يومية بليل...نروح يم وأحد من ولد عمامه
ومن أضوج ألعصر...لو ياخذني وياه للكاع...ويبقى يغني
ويشتغل بيها...نكضي ألوكت للمغرب يلا نرجع للبيت
لو ياخذني للمرقد يم أبوية...ويعوفني يمه أرجع وياه ألمغرب .
وكل ما ينزل للولاية...
علمود يسوك شغلات تخص ورشة ألنجارة...
لو شغلات تخص ألكاع...يفكدني بحاجة...
عسى ما يجيبلي قرصة ويضمها بجيبة
لو طوك...و قطعة قماش...لو ملابس داخلية
وجم مره جابلي ملابس مال نوم
ومن يجيبلي ألسيت يكلي//أتخيلته عليج حلوه بدون ما أعاينج بي ... يعني أبد ما يجيني وأيدة فارغة.
ومرات أذا ماتكفي ألفلوس
يفكدني بحلويات...لو حب شمسي
صح شغلات بسيطة...وعادية بس أني عندي كلش عزيزة .
بس شنو...أني خادمة خدمه تامه ...
وأبد ما مقصره وياه...والله مو لأن يجيبلي شغلات
لا والله...أني أصلا أحبة وأموت علية...وهو كلش زين ويايه.
حتى من يشوفني أتعب بشغل ألبيت...
يسويله تمثيلة...ويكوم يصيح علية بالجذب...كدام كميلة ،، وألبنات...وعودين يحبسني بالغرفة هو جذب يريدني أرتاح .
وكميلة خطية...مصدكة ألسالفة وبحسابها مأذيني
هي تكوم وتشيش على ألبنات...وحدتهن أبرد من مي ألسقة...يتعلجن تعلج بالشغلة أليسونها
وبليل...من تنطبك علينه باب غرفتنه
وينزل علينه هدوء ألليل...بودي أضم محمد بنص كلبي
وهو يموووت عليه...هلكد ما طايعته وبكلشي
وأبد ما أكسرله كلمة...ولا أضوجة...ودوم أكلة //
من عيوني ،صار ،تدلل
والله حتى بفراشة مدللته...ومريحتة بي
حتى هو يكول//أحس نفسي وياج ألملك شهر ريار
يعني ألقريولة صارت عدنه...عبارة عن ديكور يجمل ألغرفة...دوم أفرش وأنام بالكاع...لأن القريولة ما تكفي حلبة مصارعتنه...ونستحي لأن من وره ألمصارعة
خشبها يكوم يطلع أصوات،،،وطكطكة ويفضحنه
ومن تصير حلبة مصارعتنه بالكاع...ألفراش كله يلم
ومرات أضحك على خبالاتنه...أكلة//أحميد كلبي همزين موجود حايط قوي...جان طلعنه بمصارعتنه على غرفة علاوي .
ومشت أيامي حلوه...عايشة بيت أبوية وبحظنه
وبين دلال أحميد كلبي ألصرع كلبي بحبة
وبين دلال خواني...وحب أمي كميلة أليه .
أنت تقرأ
حصاد المواسم
ChickLitلكل زرع موسم لحصاده .. وعادة ما يحصد الزراع نتاج ما يزرعون .. ومواسم الحصاد هي مواسم اُنس وفرح وغبطة , إنها لحظات جني الثمار .. بعد جهد وتعب , وبعد عناء سواء طال الموسم أو قصر ..
