#حصاد-ألمواسم
👇
#فراقد
👇
#ألحلقة((٢٥))
××××××××××××××××××
((بارت هديه للحبايب 💐💐💐💐))
أني ماالله هداني وسكتت ...
كتله //عمي هاي شوربة حتى جريذي ما ياكلها ..
هو محمد بس أبتسم وأشرلي بيده 👍
وهز راسة بخفة مبتسم
نور كالت// من دهر صاب لسانج صاير اطول من لشتج
عصام رد عليها وكاللها //عليش تحجين عليها...
هي تلام ... لو تسمعين حجي الدكتور
والأكل المنعة من عنده ...تكولين شهر ويموت من الجوع
دخل ألسيد كال// سلام عليكم
من شاف عصام يتغدة كال// الزاد ماعليه سلام
عصام ما كام بوجهه ولا سلم عليه .
بس رد عليه السلام ورحب بجيته .
وهو ألسيد أجى وكعد يم محمد ...وكام يبوس بي
ويحمد الله على سلامته...ويكله// هسه ضوة عيوني
بشوفتك سالم .
محمد باس ألسيد من جتفة ...
وحجى وياه بصوت ناصي ... ما أعرف شگاله
ما سمعناه لان شاورة ..
وألسيد كاله // ربك أرحم الراحمين لا تخلي بالك!!!!
كميلة جهزت قريوله لمحمد ... وخلتهه آله بالهول
حتى تصير الكومة والكعدة سهلة عليه.
للعصر ... وأعمامهم ولدهم أجمي على محمد
ناس تخلي جوة راسة فلوس...
وناس لا والله جايبين كيك لو عصاير لو فواكة
وأزهيران الحقيرة جايبة وياها كيكة مال بيت
ولافتها بجريدة ....وتكول لمحمد // أبن عمي
والله أنشلش عگلنه علمود صحتك...الحمد لله على سلامتك ...سويتلك كيكة وخليتلك بيها زبيب ...
أدريك تحبها ويه الجاي
يالله ...هاي البنيه راح تسوي بيه سكر نفس طوعة
ابد ما أهضمها ... ولا أجرع خفتها
غثيثه تنام على المعدة .
لليل ... وعصام والكل راحوا لبيوتهم
محمد كال لكميلة // خلي البنات ينامن بغرفتي.
كميلة كالتله// لا فرشتلهن يمي
عاد نمنه بغرفة كميلة ...
نور تتحرج من ألسيد ...أني وياها نمنه بدخولية الباب بس من هذاك الطرف ..
وكميلة ...وألسيد ... وحمودي ... وعون ...ناموا بالطرف الثاني من الغرفة
الصبح كعدت على صوت مزعج ...
أباوع بس أني نايمة بالغرفة ... محد موجود
أني أبقى الليل كله أتكلب ... وأنام بوكت متأخر
كمت من مكاني طلعت للطرمه
وأشوف محمد المصروع ...محشم كميلة ونور
وعلاوي وباقر ...ومطلع غرفة الاخشاب مالته بالطرمة وكل الفراش...والغراض نور وكميلة ينكلن بيهن بالهول
هو راد يحرك الغرفة ...
بس كميلة ما رضتله ...كالتله// هسه الولد يحملولها بسيارة بشارة ...ويزتوها لورشه النجاره ...
يصلحوها الولد ويبعوها ... العفة والتبطر موش زين
أنت تقرأ
حصاد المواسم
ChickLitلكل زرع موسم لحصاده .. وعادة ما يحصد الزراع نتاج ما يزرعون .. ومواسم الحصاد هي مواسم اُنس وفرح وغبطة , إنها لحظات جني الثمار .. بعد جهد وتعب , وبعد عناء سواء طال الموسم أو قصر ..
