#حصاد-ألمواسم
👇
#فراقد
👇
#ألحلقة((٣٩))
×××××××××××××××××
جبتلي گلب ثاني بلكت أنساك
صارتلي مصيبة ...وحبك ألثاني
عليك تعاركوا هذا كتل ذاك
زعل گلبي أعله گلبي وموتاني
÷÷÷÷÷÷÷÷÷÷÷÷÷÷÷÷÷÷÷÷÷÷
رجعت من يم سهاد ميته من ألبجي ...
شسوي ما أدري..وأشوف ألكل راضين على زواجي من أبو أبراهيم
عدت على سالفة يمكن عشرة أيام ...وردت رجعت
هل مرة أم أبراهيم ...وخمائل أخت حسيون
وهم كعدن ساعة وية كميلة .
وأني نفس جوابي ..ما أقبل بي لان شايب
وما أريده ...لان مو حلو
بيوم ألسيد دز على نور ...أجتي هي وحسيون
وبتها ألخايسة نبأ ... وحبيبي زيد
ألسيد كال ألنور //بوية ألعقاري هبط فرد هبطة
وفليساتج هسه خوش يجبلج عقار ...
ليش ما تشترين بيهن هسة بدال ألدار دارين
وعوفج من ألسيارة لو ألكاع
نور كالت للسيد//بكيفك أبو عطأ...وبكيف أبو زيد
أنتم بعد شوف شلون أدبرون ألموضوع ...
وبعد أحسن أذا ألورث يجيب بيتين ،
حتى أسجل وأحد با أسمي
وأحد با أسم أنتصار .
وصدك بقى ألسيد...وحسيون...يفترون بالمناطق ألقريبة
وأشتروا بيت قريب على...مرقد ألسيد محمد بن عقيل بن أبي طالب...سجلوا باأسم أنتصار
وأشتروا بيت بصف مرقد أولاد مسلم ...يعني قريب على ألمرقد سجلوة با أسم نور
وهاي سالفة ألبيع وألشره طولت أكثر من شهر
لان كله روح للمختار ... وروح للناحية
وبعدين للمحافظة ...وبعدين للعقار مال ألولاية
وهسة غير يفكون مني ياخه ...لا بالطبه وبالطلعة
ها يصخام ...شكلتي على أبو أبراهيم
أكلهم بالعربي//ما أريده شايب مو حلو...وعنده أثنين نسوان ...ما يفيد ألحجي وياهم
وهو ألحقير ...أبو أبراهيم جاب مرته ألجبيره
ألحقيره أم أبراهيم ... وأجى على بيت ألسيد
يريد يحجي ويايه ... ويفتهم ليش ما أقبل بي
ختلت بغرفتي ...ولا طلعت عليهم
للبستهم لبسة ألگلو المكطع ومشمور بالزباله
وألعجبني مرته الحقيرة أم أبراهيم
هي ما تغار ...وتضوج ...جاية وتخطب الرجلها
وفوك ضيم هاي ألهوسة ... وشلت حالي
وألكل ضاغط عليه إلا أوافق على ألزواج
يجيني ضيم أزهيران ...بين يوم ويوم
وصبحت بيت ألسيد ،
ألصراحة شكد ما أضوج منها...بس أكيف عليها بسالفة ألكراب ،
حتى أحس كميلة تعرف بجيتها...ولزكتها بيتهم
علمود محمد ألمصروع
بس خوش تستغلها...شكو شغلة متعبه أطلعها ألها
تسفط ألنضده ... تدرج الزوالي ألنظيفة
تغسل ألبيت ... وترجع تفرشة ،
تنفشلها كطن لو ألصوف
وأذا ما عدها شغلة تحشمها على ألمواعين
وتنطيها سيم ناعم ...وصابون دهن يشبه صابون ألركي
وتكعد لا ساعة ... ولا ساعتين تجلف بالمواعين
أطلعهن مرايه من ألنظافة .
أنت تقرأ
حصاد المواسم
ChickLitلكل زرع موسم لحصاده .. وعادة ما يحصد الزراع نتاج ما يزرعون .. ومواسم الحصاد هي مواسم اُنس وفرح وغبطة , إنها لحظات جني الثمار .. بعد جهد وتعب , وبعد عناء سواء طال الموسم أو قصر ..
