نظرات جنوبية

البارت 26

اراكَ والحزن يختفـي
و الوجـع يذهب ..
والحب يزداد
والمشاعر تجتمع
والأشتياق يغلب عليّ
واللهفـة لـرؤيتكَ هـي التـي تفعل كل هـذا !!

زهرة:

وصلنا لبغداد الساعة 2 بليل ..
دخلنا البيت هدوء والكل نايم
رحت بدلت وحضرت ملابس الدوام لان باجر احد
بس اني جنت مخلصه كل واجباتي قبل لا اروح للبصرة ..

فتحت جنطتي وطلعت قميص جسار
خليته ع المخدة مالتي ونمت ..

في الصبـاح الساعـة 6:30 ..

زهرة:

فزيت علئ صوت ماما وهي تكعدني تكول ليش ماكعدتيني من اجيتي، كعدت سلمت عليها وعلئ خواتي وبابا ...
وتريكت وبدلت ورحت للمدرسة ..

من انخطفت بابا ماقبل اروح مشي حتئ لو مدرستي قريبة لأن صار يخاف عليه ..وسوالي خط بس اني شهرين وتركت الخط ..لأن اختنك وخاصة مدرستي قريبة علئ بيتنا شوية مسافة مشي وأوصللها ..

طلعت من بيتنا وكتاب الفيزياء بيدي ..
صديقتي زمرد بنفس الشارع مالتنه
شفتها طلعت من بيتهم ، باوعتلي وابتسمت
اتقربت سلمت عليه

وضلينا نمشي سوه ..

زمرد صديقتي من الطفولة من ايام الابتدائية هي و نورهان
كلش احبهم واحسهم خواتي مو بس مجرد صديقات ..
كل اسراري عدهم واسرارهم عندي،
مانضم شيء علئ بعض ..

زمرد بيضة وعيونها كبار ورموشها كثيفة ..
وحنينة حيل ..

نورهان محبوبة وضحكتها احلئ شي بيها
حنطاوية ومعانيها تجنن وكلبها طيب كلش ..

وصلنا للمدرسة و لكينا نورهان واكفة بالساحة وكتابها بيدها
وبالأيد الثانية كيكة ..

سلمت عليها ..
وكالت زمرد

زمرد: طبعاً نورهان اريد يوم مااشوفج لازمة اكل بيدج
اريد اعرف وين يروح الاكل وانتي رشيقة؟!

ضحكت وجاوبتها نورهان

نورهان: هههههههه عيني اني مايبين بيه لو اكل منا لبعد سنة ..

زهرة: اي شخباركم، مشتاقتلكم هوايه

زمرد: سامعة هذا المثل اليكول
من لگـه احبابه نسه اصحابه ..

زهرة: ههههههه اي ليش؟

زمرد: رحتي للبصرة ونسيتينا خيه ..

نورهان: اي صح كلامهه
شو نسيتينا ولج؟

زهرة: لا والله مانسيتكم بس ماراسلتكم لأن خطار واستحي شيكولون عليه ..

زمرد: اكيد ..لأن أتوقع انتي هناك كابلتي جسار وكعدتي موو هههههههههه

زهرة: ضحكت وضربتها بالكتاب علئ راسها ..

زمرد: لتضربين لج دااحجي الحقيقة
هو انتي من نجيب اسمه عيونج تلمع مو انوب تشوفينه ..