نظرات جنوبية

البارت 13

الليل بعيوني انتچة
وصوت اسمك ببالي انحچة
ومدري يا عين البدت بية البچة
للنوم چن رايح حرب
مثل اليعارك مايحس
من خلصت ليلي الصبح
لاكيت روحي مدچچة !!

جسار:اني هم حاس عليها ترفض، بس انشاءالله ماكو شيء ..
يلا نامي ولاتشغلين بالج ..تنحل أنشاءالله ..

زهرة: نمت وأطمنت شوية لأن هو واكف ويايه بالرغم انو اني خايفه من ردة فعل أمي أذا يخطبني مرة ثانية ..

كعدت ثاني يوم و القلق ياكل بيه ..كل شويه أباوع لتلفون ماما خاف يتصل جسار و يحجي وياها ..

الئ أن جنت كاعدة العصر أتفرج عالتلفزيون وماما بغرفتهه
دك تلفونها واحس كل جسمي بدأ يرجف ..
جاوبت واسمعها تكول ..

ماما: اني بنتي ماانطيها تعذرني، مكان بعيد ومااتحمل وحده من بناتي تتزوج بغير محافظه وثاني شيء هي بعدها صغيرة و مااكدر أخليها تفرط بدراستها وتتزوج وهي بهالعمر!!

سكتت شويه وبعدين رجعت كالت ...

ماما: اي تحبها ماكلنه شيء بس شلون تترك دراستها!
اذا تريدهه أنتظرهه تتخرج وتالي يصير خير ..
اني هذا العندي يا جسار، بنتي ماانطيها !
وأتمنئ تبتعد منها ..
مع السلامة ..

زهرة:
أنصدمت من كلام ماما ورجعت لغرفتي واحس حتئ الهوه ماكاعد يدخل بريتي ..دموعي اتجمعت بعيوني ..
يعني شنو؟! ماكو بيناتنا نصيب وماما راح تضل رافضه ..
شنو ردة فعل جسار هسه وشراح يسوي ؟

ضليت أفكر ودخلت ماما لغرفتي ومبينه عصبيه حيل ..

زهرة: شبيج ماما ؟!

ماما: تريديه؟؟

زهرة: أنصدمت ..منوو ماما شنو اللي أريده ؟!!!

ماما: جسار! تريديه أحجي ؟؟؟؟

زهرة: دنكت وخليت ايديه علئ وجهي وبجيت!!
ماحجيت ولا نطقت أي حرف، دموعي هي وحدها كافية تشرح حبي اله ..

ماما: أذا تكولين ما إريده دراستج ماتتركينها وعلاقتج بيه تنقطع نهائياً،
وأذا تريديه وتحبي خل يجي يخطبج بس بعد ماعندج أم
وصدكيني!! ماراح تتهنين وياه لو أخذتيه ..
أسمعي كلامي كلش زين، هو مارايدج الج ولا محبةً بيج
هو بس شافج فقيرة وكال اي خل اخطبهه واتزوج حتئ بالمستقبل يستقوي عليج ..
و طلب تتركين دراستج لأن حتئ مايحس أنتي أعلئ منه وأثقف منه ..هاي الناس اعرفها كلش زين وحافضتهم واحد واحد ..اعرف اهله شكد ناس متعصبين وعدهم الجنه بس لخدمة العيال ورجلها وجهالها ..ولج بهالعمر تردين تزوجين؟
ودراستج؟ ومستقبلج؟
ترحين تعيشين بغير محافظة؟ تتحملين؟ كوليلي يله جاوبيني تتحملين؟ تعيشين بـ بيئة غير بيئتج وتغيرين لبسج وتصرفاتج وتتركين دراستج علمود شخص !!
بعدج صغيرة والعمر كدامج ..ليش تضلمين روحج ..
اني أكدر هسه اخابره وأكوله موافقة ..وأنطيج اله
بس ماكدر!! شلون اخليج بعيدة عني واني مااطمئن عليج ..
أسمعي كلامي وفكري بيه كلش زين ..
اني امج وصديقتج وأتمنالج الخير بس مو وياه ..!!

أبسط مثال راح أحجيلج وأنتي بعد تفتهميها بعقلج لو بكلبج!
أخر مرة من أجه جان كاعد وجابوا موضوع الدراسة والكليات
تدرين شنو كال؟!

كال اني مرتي ماخليها تكمل! وتلبس عباية!
وطلعه وطبه ماكو ..يعني اتخيلي أنتي ..
شلون راح تعيشين وياه؟ وأهله ناس متعصبين وهو هم؟!!

زهرة:
بس دموعي تجري وماعندي اي كلام، شهكاتي احسها وصلت لسابع جار ..كلبي ضل يوجعني وشعور مو حلو أبد ..
خيرتني بين دراستي وبين جسار ..وكامت طلعت!!!
وعافتني اني وعقلي والتفكير سلب مني كل طاقتي ..
أفتر بالغرفة وابجي ..ومخليه ايدي علئ كلبي اللي أحس ماصار ينبض..حتئ دكاته صارت هادئة حيل وتأذيني ..
ماحسيت بنفسي ونمت بالكاع بدون لامخدة ولا شيء
شبه ميته، فاقدة ..جسد بدون روح ..كل أحساس حلو أندفن ومات ..

نسيت حتئ تلفوني وماراسلته ولا دزيت شيء لأن هو هم ماداز اي رسالة ..يمكن أبتعد مني مثل ماكالتله ماما !!
ويمكن راح ينساني ومايحاول يتقرب مني أبد ..
يمكن ضاج وأنقهر من كلام أمي!
تفكيري موتني وحتئ دموع مابقت عندي حتئ ابجي ..
خلصت كل طاقتي بالبجي!!!
صرت أبجي بلا دموع ..واحس عضامي متكسرة لأن نايمة بالكاع ..

ماطلعت من غرفتي وماشفت اي شخص ..

مرت يومين واني بدون اكل وطاقة ماعندي، صرت مااكدر أمشي خطوتين ..كل شوي يصير عندي هبوط بالضغط
بس كل هذا ومقاومة!!
جنت ماأكل بس أشرب مي لأن أعطش ..
وأمي تحاسبني بس أني ماأخد بالكلام...

حبست نفسي بغرفتي واعتكفت بيها! حتئ تلفوني ضميته ومافكرت حتئ أراسله ..
صرت أطلع من غرفتي بأوقات قليلة ..
أطلع بأبتسامتي الجذب ..وأرجع واني دموعي تارسة وجهي!

المخدة صارت تفهمني أكثر من اي شخص ..
بس أخلي راسي تتطشر الدموع عليها والتفكير يسلب مني حتئ النوم ...مرت عليه أيام جنت أتمنئ عيني تغمض لحظة ..
صرت عكس الناس بليل ابقئ كاعده وصافنة وبس أفكر
والصبح انام ......يتتتبببببع

شنو رأيكم + توقعاتكم ..

لاتنسون التصويت 💜

فـي آمان الله وحفضـهِ 🍁..