نظرات جنوبية

البارت 3

ألسعف مايرچف بگدي أذا شفتـك ..

ماما: اي شوكت تزوج حتئ نفرح بيك ?
جسار: اذا عندج مرة زوجيني 😂
ماما: اي اشوفلك ليش لا
جسار: ليش ما تنطيني وحدة من بناتج ؟!

حجاهـا بضحك وباوعلي ورفع حاجبه بنظرة سريعه ..حسيت ايدي صارت ترجف وارتبكت، بس حاولت انو اني ماسمعت شنو گال ..

جاوبته ماما: اي انطيك ليش لا
جسار: ههههه يلا الله وايدج

اباوعله وعيوني تحير شنو توصفه ..هالشخص هذا اخذ كلبي وعقلي وكلشي بيه ..ياريت يطلع احساسي صدك ويطلع يحبني ..

خلصنا العشا وكملنا و رجعنا لبيتنا لأن الحنه جانت ببيت عمي الثاني .. و وره يومين سافر جسار للبصرة ورجع لبيتهم ..ورجعت اني اشتاقله 🤷‍♀️و هو بعيد

مر شهرين علئ خطوبة ابن عمي وبعدين حددوا موعد العرس
وصارت أقاربنا تجي قبل العرس بيوم أو يومين ..
جان كل همي انو اشوف جسار ،ماجنت مهتمة للعرس اكثر مامهتمة اشوفه ..صرت احب المناسبات وانتضرهم بس حتئ اشوف جسار لأن ادري هو بس بالمناسبات يجي ..

قبل الحنه بيوم اجه جسار  ..حسيت روحي رجعتلي والضحكه صارت متفاركني ..
جنه كاعدين نسولف بالاستقبال الكل كاعد عمامي وزوجاتهم و ولد عمي و بقية أقاربنا ...
عمي كال لـ جسار اقرالنا موال مو صوتك حلو خل نستفاد 😂..

جسار: تدلل

بدأ جسار يقرأ وعيوني مانزلت عنه  حركة ايده و رفعة حاجبه من يحجي لفتت انتباهي، تفاحة ادم و شامته اللي ماخذه عقلي كل هذا واني صافنه بيه ومانتبهت هو شنو يقرأ..صوته يجنن و بي بحة جنوبية ..بس ماكدرت اتذكر شنو كال لأن جنت صافنة بيه ..

كمل وكالوله :عاش هالصوت

ابتسم و دار وجهه وألتقت نظراتنه رفع حاجبه وضحك ..
خفت انو احد ينتبه درت وجهي منه  . .

بيوم الحنه الظهر . . جنت واكفه بالاستقبال انطي جاي لعماتي و زوجات عمامي  ..وكاعدين سوالف وضحك ونص من البنات ينضفون البيت لأن الحنه مالت النسوان عدنا ومالت الشباب بالشارع ..

دخل هو وكف يم ماما و صار يسولف وياهه وهم رجع كاللهه

جسار: اي عيني مالكيتيلي عروس 😂
ماما:لا مالكيتلك
جسار: زين اذا اخطب منكم تنطوني؟
ماما: وين نلكه احسن منك

فتت من يمه وبيدي صينية الجاي ، باوعتله بعدم فهم وبنفس الوقت جنت خايفه يخطب غيري ..

باوعلي وابتسم و طلع ..

وراها رحت حظرت نفسي ولبست فستان قصير لحد الركبه لون اسود، ضيق من الخصر و عريض من جوه ..
و كعب اسود (لأن اني قزمه ههههه)
و سرحت شعري ولبست اكسسوارات خفيفة ورحت لبنت عمتي تخليلي مكياج لأن جنت مااعرف وخليت مكياج خفيف كلش حسب عمري ..

بدوا الناس يجون وصوت الأغاني عاليه ..
نزلت وجنت داامشي عـالدرج بهدوء لان اكره صوت الكعب
تفاجئت بوجود جسار كبالي!! باوعلي وخزرني واشر يمه
شفت ولد عمي اثنين واكفين يمه ..ماجنت اعرف يقصد منو
فـ أجه قريب مني وكال وهو يصك علئ سنونه وبعده خازرني

جسار: ارجعي صعدي لا ابتلي بيج ..
زهرة: ليش ؟
جسار :امشييي اصعدي بلا حجييي

خفت ورجعت صعدت لأن عيونه صارت حمر و يخزر بيه بشكل مرعب ...خفت وصعدت وانتضرت يروح يلا انزل ..
سمعت اختفئ صوتهم نزلت علكيف وايدي عالمحجر مالت الدرج والأيد الثانية علئ كلبي ..فات مني ورفع حاجبه وكال بصوت ناصي

جسار: يتكسر راسج اذا عدتيها فهمتي ?!
زهرة: هزيت راسي بسرعة وركضت للأستقبال بس أريد اخذ نفس .... يتبـع

شنو رأيكم 💜وشنو توقعاتكم
لاتنسون التصويت ..

في أمان الله وحفظـه 💜