نظرات جنوبية

أيامٌ بِلا مَعنئ.

عد يا عصب بالراس شيمة ؟
يمحي التفاصيل القديمة
الخلّت سنيني بلاية قيمة .

- المرحوم علي مهدي.

بيوم من الأيام..خلال الأسبوع السابق، جنت كاعدة اتغدا بأمان الله، كاعدين اني و ماما و مرت عمي أخته لجسار..

سولفن بيناتهن وجابنها علئ غرف العرس وأشكالهن و من هالأمور، واني ساكتة، لأن بطبيعتي من انزل جوه اسكت هوايه و ما احب احجي، أحب اكون مستمعة.

و اني اكل، مرت عمي گالت:...اشتروا غرفة لجسار قبل كم يوم..و حددوا يوم العرس
يوم 23 بهالشهر.

غصيت! حسيت اللگمة وكفت ببلعومي وبنفس الوقت ما أنطيت أي ردة فعل حتئ ما أخليها تحس.

بدت ماما تسألها شنو حضروا للعرس و هي تجاوب و اني روحي تلوب بس هاااادئة!
گمت من يمهن ورا كم دقيقة، رحت غسلت و صعدت فوك واني ماعرف احساسي شنو، امشي واضحك، و أهز بأيدي.

صدمتي ما جانت بعرسه، صدمتي جانت من الموعد!
ليش يعني من دون الأيام قرر يتزوج ورا أول يوم من أمتحاني!
زين مو عدهم بنات اخوه سوادس ببيتهم شلون راح يسوون عرس؟

ورا صفنتي الطويلة گلت خليها علئ رب العالمين و علئ صاحب الزمان(عجل الله تعالئ فرجه الشريف).

و بديت اقرا وهكذا مشت الأيام، اقرا بالنهار و بالليل من أريد انام الگه روحي افكر بيه و بعرسه و احاول قدر الأمكان انو الگه طريقة تخلي ماما ماتحس عليه انو اني مهتمة، لأن كل يوم تذكر عرسه وتگلي راح تتبچبچين علمود واحد ما يسوه..

ما تدري اني صارلي أشهر ما ابچي!، و إذا بچيت فـ أبچي بسبب قصيدة لـِ أهل البيت"عليهم السلام".

كل ما انقهر و أتعب جنت اگول: يارب هاي دموعي لا تخليها تنزل علمود جسار، خليها تنزل علمود مظلومية أهل البيت عليهم السلام.

و فعلاً هالأيام اني هيج! أصبر روحي بالقصايد و ابچي هوااي، بس مو علمود جسار!

بكل يوم كاعد أسمعهم و هم يحظرون لعرسه، و يردون يرحون عمامي و أهلي وأخته وكل جهالها.

من ناحية احس گلبي مات، و من ناحية أحس اكو فد شي بداخلي بس ماكدر أفسره، البارحة قبل لا أنام بعدني هستوني مغمضة عيوني و أجت گبال عيني كل ذكرياته...
وحدة ورا وحدة...

بـ 2017
من أتوفئ جدي و هو جان كاعد يم الدرج لام رجليه و مغطي وجهه و يثغب و يبچي، و من ورا السابع رادوا ينزلون التخم مالت الأستقبال لأن جنه مصعدينه فوك بفترة الفاتحة، صعد هو و الولد، وامي رزلتني بوقتها گالت صعدي لمي الملابس الشارتهن ع المحجر، صعدت و هو يمشي واني وراه، جان يمشي علئ كيف بحيث غثني، اتمنيت اطفر واصير گباله وامشي سريع علئ گد ما هو بطيئ، لميت الملابس و من راد ينزل عيونه بقت تراقبني لحد ما نزل، هو يباوع واني اغلس وهم أرجع أباوع،وجنت اسميه بديج الفترة (الـ يتعيقل بمشيته).

بـ2018
اتوفت عمتي...و هم جان هو موجود، وجنت بعدني اقلد عليه حتئ ما اوهم روحي بحبي اله، بوقتها صار بيناتنا هوايه مواقف، من ضمنهم مرة جنه نتغدا بالمطبخ بأيام الفاتحة واني بالمناسبات ما اكل تنسد نفسي و خاصةً الفواتح، مديت ايدي لكارتونة بيها لبن، ردت اخذ واحد و هو اجه اخذها بدون ما ينتبهلي، من أنتبه طلع بطل من الكارتونة و گال: هاج خالو،
گتله ماريد، بس هو عاف البطل بالكاع و راح.

الموقف الثاني، جنت واكفه يم امي تسوي عشه، طلعت من المطبخ و صار بوجهي بحيث حسيت شوية وادخل ببطنه هلگد ما طويل، هو ارتبك و اني هم، بوقتها فريت البيت فر من التوتر.

الموقف الثالث، من كاعدين بالممر اني وبنت عمي و هو فات و وكعن فلوسه من جيبه، وراحوا الجهال ينطوهم اله،
الموقف الرابع، من الكل كاعد بالأستقبال ورا ما أنتهت الفاتحة، الزلم كلها كاعدة بيهم عشرين واحد، والنسوان هم هواي، جان بيني وبينه اخته، من گمت گلي: بعد خالج استكان جاي، وانطاني الأستكان أصبله، رحت اصب واني ارجف رجف مو طبيعي، شلون هيج گبال الكل حاجاني و شكد بوقتها صرت حمرررة دم من الخجل، صبيتله ومترددة أدخل لو لا، أتوسلت ببنت عمتي توديه بس هي ماقبلت، تاليها انطيته و گال: رحم الله والديج خالو.

الموقف الخامس، من رادوا يرجعون للبصرة فات مني و گبال امي گال: بس الليلة أريد وياج، ومن غبشة الصبح ماشي، امي اتعجبت بوقتها، هو يمشي و يدندن ويقرا موال متعودين عليه بس من گال هيج امي صفنت عليه!

وبعد شحجيلكم من مواقف؟ اني گلبي مليان ذكريات لا وحدة و لا ثنين، و من أجيب سيرتهن كلهن يلتمن!

المهم...ادعولي، شكد مابيكم أدعولي تمر هالأيام بخير، وأمتحن و اجاوب وما يأثر بيه شي،
و ادعولي انساه بگد ما حبيته!

و أحبكم.

الأنستا.. zhareii
قناة التلي.. t.me/zhirtna
بوت التلي.. zhiirbot