نظرات جنوبية

البارت 6

‏وَكُل مُناي أن أنساك حقًا
‏وأن أمحوكَ مِن نَصّي وشِعري
‏ولَكِن كُلمَا خَطَيتُ سَطْرًا
‏وَجَدتُكَ مُلهِمي وإمامَ فِكرِي!!🌱

بقيت 4 ايام نفسيتي تعبانة ومالي خلك لكلشي حتئ دراستي هملتها وطول الوقت اني صافنة وبالي مشغول ..
ماما خابرت بنت اخو جسار وكالتلها زهرة تريد تكمل دراستها واني ماانطي بنتي بهيج عمر !!
ماعرف شنو صارلي من سمعتها تكوللها هيج ..كل مشاعري اتجمدت ..حتئ آمل مابقئ عندي ،نفسيتي تعبت وكرهت كلشي ..

مرت أربع شهور واني ما شايفة جسار ..اشتاقيتله كلش واتمنئ اشوفه 💔..

الئ أن اجت زيارة الأمام موسئ الكاظم (ع) ورحنا مشاية اني وماما و خواتي و نسوان عمامي ..
نمشي والدنيا ليل الساعة 8 بليل والجو حلو
جان اكو رجال چبير بالعمر مخلي صينية وبيها شموع هوايه
و ملتمين يمه نسوان وبنات وشباب كلها تشغل شموع ..
ماما كالت امشونا خل نشغل شمعه ..ونطلب مرادنا من الأمام ..
رحت وياهن وشغلت شمعة ودعيت انو اشوفه 💔، تمنيت من كل كلبي انو اشوفه ..
كملنا مشي و وصلنا و زرنا ورجعنا للبيت ..من التعب رحنا نمنا كلنا ...

ثاني يوم خلصت الزيارة و كل الزوار رجعوا لبيوتهم ..
جنت نايمه الظهر وسمعت صوته !! عبالي حلم ..رجعت غمضت عيوني بس صوته مايروح من اذني ..لا هايه حقيقة مو حلم ..
فزيت وكعدت رحت سألت ماما ..

زهرة: ماما منو عدنا ؟!

ماما: جسار ..

زهرة: اها اوك

رجعت لغرفتي واني عيوني تصب دموع ..يعني معقولة دعائي أستجاب؟ البارحه دعيت اشوفه واليوم تحققت امنيتي،
يعني هاهيه اني راح اشوفه واشرحله كلشي بعيوني ..
💔بجيت من الفرحة ومن الضياع اللي اني بيه ..
رجعت اتمددت عالسرير واني ايدي علئ عيوني وافكر شلون راح اشوفه وخاف يروح ومااشوفه ..!!
من بين افكاري صحيت علئ صوته ..

سمعت صوته جوه كعدت بكل حماس اريد اسويلي حجه حتئ انزل اشوفه قبل لايروح، كلت الـ ماما اني حروح اشرب مي
باوعتلي بطرف عينها وكأنو تعرف ليش اني نازله

نزلت واسمعه بالاستقبال كاعد وياهم ويريد يروح
دخلت للمطبخ وفتحت الثلاجه وسويت نفسي اشرب مي
دخل هو للمطبخ شافني ابتسم و گال: شلونج
كلت زينه الحمدلله ، واحس عيوني تركص من الفرح وهو يباوعلي ويبتسم ..
مدري شلون شفت طريقي وطلعت من المطبخ فرحانه كلش احساس ماكدرت اوصفه بس اللي يشوف شخص يحبه من بعد مدة طويلة هو راح يحس بهذا الاحساس ..رجعت ركض لغرفتي وايديه علئ وجهي واضحك ..احساس يجنن
صار 4 اشهر ماشايفته واليوم شفته ..
شوفته ونظرات عيونه كدرت ترجعلي مشاعري اللي راحت واني سمعت ماما ترفضه ..انزرعت بكلبي بذرة من الآمل اتجاهه ..

كل مرة نلتقي بمناسبة فرح او عرس ..أما هلمرة ألتقينا بوفاة الأمام موسئ الكاظم (ع) ولأن هو متعود بكل زيارة لازم يحضر ..ماحسيت بالوقت واني افكر ومبتسمة وكل مشاعري حسيتها تزيد وحبي اله يكثر يوم بعد يوم ..
رحت صليت المغرب واتشكرت ربي لأن اتحققت امنيتي ..
كملت صلاتي و طلعت دفتري المفضل اللي دائماً أكتب بيه كل مشاعري ..

كتبت :

مرات سعادتنا تكون بأيد شخص واحد، مجرد شوفته تسوه الدنيا عدنه ..احساسنه وكلامنه ونظراتنه وياه تختلف ..
لدرجه نصير ندعي بصلاتنه انو ربنا يحفضه النا ..
نحبه بحب نقي و صافي وكل همنا هالشخص يصير بخير حتئ لو كان بعيد عنا ..حتئ لو فقدنا الأمل بحبه لازم نرجع ونزرع بذرة من الآمل بداخلنا ..الحب الحقيقي يجي للأنسان مرة وحدة ومن بعد هالحب مايكدر يحب بعد ..

وآخر شيء كتبت:

"نظرت لعينـاكَ فأدركتُ الحب بنظرةً .."

ولأن جنت فرحانه ماجنت اعرف اني شنو دااكتب، صرت اكتب فصحه وعراقي بنفس الوقت ..
فرحتي بشوفته تسوه الدنيا ..رجعلي عافيتي بنظرة من عيونه ..مشاعري واحساسي وكلشي حلو رجعلي بنظرة وحدة ..بلرغم من انو هلنظرة جانت مدتها عشرين ثانية!!
هالأنسان صار هو سعادتي، هو فرحي وحزني ..
هو اول حب بحياتي وأخر حب ... يتبـع

شنو رأيكم بالبارت؟
وشنو تتوقعون جسار يحب زهرة لولا ..؟

لاتنسون التصويت فضلاً وليس أمراً 🍁

دُمتـم فـي أمان الله وحفظـِه ..