نظرات جنوبية

البارت العاشر (والأخير)

إلئ اللقاء..
يـا أعـز العابِـرينَ فـي عـمري..
و كُلمـا لَمحتَ ضَلّي تحتَ سَقفِ السَمـاء..
أعلم أنكَ مـا زَلتَ تَسير مكانِ الدمـاء..
ذلك المكان المهجور في قلبـي، كنتَ تَقطنهُ و اليومَ ذِكراكَ تَسكنهُ!
الدمعُ يبكي دمـاً..
و لكنهُ القدر! و ما أختار أن نكون معاً..
لِتكون أجمل من رأت عينـي..
رغـمَ أنكَ لن تكونَ معـي!
إلــئ اللقـــاء، مَـن دونِ أن يَكونَ لَنـا لقـاء.

جَسار غَصة القَلب، و وَجعُ الروح الذي لا ينتهي..رجلاً عَذب قلبي، و هاجرني..بَعد أن كنتُ
أنا موطنهِ، و روحهِ و راحتهِ!، كيف هانَ عليهِ قلبي و كيف هانت مَواجعي..
لا أدري كيف وصل بنا الحال إلئ هذا الحد، وَصلنا إلئ خط النهاية، حيت اللارجوع!

.................

زهرة: ودعته برسايل! بدون مايكون النا لقاء! وحتئ ماراح يصير بيناتنا لقاء بعد..
جان يوم الخميس صعب عليه..صعب لدرجة نمت بيه أربع ساعات الصبح، وراها كعدت بقيت انظف لو أقرا، اسوي اي شي حتئ ما افكر، و رغم كلشي اسويه ابقئ أفكر.

الموضوع ما جان سهل أبداً، شخص تحبه من وأنت صغير، من أنت طفل!
شخص كعدت وياه وضحكت و يدري بأسرارك، يدري شنو ضام گلبك، شخص عشت وياه مواقف بحلوتها و مُرتها..
شخص جان ماينام إلا علئ صوتك، وما يطلع إلا ياخذ رأيك بملابسه.

حاولت اهون علئ نفسي، وأكول تهون وهي صعبة!
فكرة انو جسار ماكو بعد فكرة تخوفني، بعد ماكو شخص اضوجه بنص الليل برسايلي وأنكد عليه واقهره، بعد ماكو شخص اگله اقرالي هذا الموال عجبني واتخيلته بصوتك، بعد ماكو شخص يگلي(جنج نص قالب ثلج)ويقلد علئ طولي..

بعد ماكو شخص من يشوفني يبتسم، ويگلي هلاا خالو حتئ يضم حبه!
بعد ماكو شخص يگلي(راح ابقئ احبج لحد اخر نفس بيه)..

اختفئ حب حياتي..خطب غيري! والخطبها جنت اني ألعبها من جانت صغيرة وتجي لبيتنا..
عيشني اصعب اسبوع بحياتي، لا اكل مثل الناس، ولا نوم، قلق بقلق و روحي صارت سعفة لو يطخها الهوئ تميل..

بيوم خطوبته، بليلة الخميس مانمت، ضليت كاعدة ساعة اسمع موسيقئ، ساعة اطلع مدلل البيت خطبناله عروسة حتئ اتقبل الواقع و انو هاهيه عادي واذا خطب؟!

بس ما جان اكو شي يطفي نار گلبي..
اطلع صورته اصفن بيها، وما ابجي، شكد تمنيت ابچي، بس ماكو دمعة توكع من عيني..

طلعت الشمس واني بعدني مانايمة، گمت واني انتچي علئ الحايط لأن مابيه حيل، ماجنت مريضة، بس خطوبته بقالها ساعات واني روح ماضلت الي..

جنت خايفة علئ نفسي، خاف افقد روحي من اشوفه لابس قاط و كاعد يهوسوله، جنت خايفة خاف ما احزن هسه وابقئ طول العمر حزينة، جنت خايفة دموعي الضميتهن هسه ابچيهن طول عمري..

گمت اتوضيت واني بالگوه امشي، فرشت سجادة الصلاة وخليت التربة و بديت اصلي، جانت اكو غصة بگلبي، من كملت صلاة اتربعت وكعدت..