نظرات جنوبية

3

وبالصدك ما جمعتنا الأيام
مشطت شعري گبل لا أنام
بلگي صدك تجمعنا الأحلام
ضليت أخط بأحلامي و أبني
وما أيست منك بعدني
بنتك أريد أخطبها لأبني
أبن أبني و أنت تصير من تالي جده
من ثوبي أفصل ثوب وجه المخدة!

مرت أيام علئ محادثتنا الأخيرة، لحد ما أجت أيام زيارة الإمام موسئ بن جعفر "صلوات الله عليه" قبلها بكم يوم چنه نحچي و گال راح أجي مثل كل سنة متعود، گتله أريد أشوفك گال ما أگدر أجي، تعرفين بغداد شيصير بيها بهيج أيام و شكد إزدحامات، قبل چنت أجيكم و رجليه حيل تتأذئ والله لأن مشي، هالمرة تعالوا أنتوا
مو تگولين بكل مرة نجي أنتِ و أمج وخواتج وبيت أختي، تعالن هالمرة و أني أخابر
أم علي" أخته" و أخليها تجي للموكب مالتنا و أشوفج..

گتله ما أدري أشوف..
و أجت الزيارة و صار عندي خبر أنو هو ببغداد، بقيت يومين ما نايمة أنتظر بلگي يجي
و ما أجه..
لحد آخر يوم بالزيارة العالم رجعت كلها و چانت بوقتها ظهرية فَـ دزلي رسالة "أنا جايكم"
طرت من فرحتي وحسيت الگاع ما شايلتني..
واخيراً اشوفك ورا سنتين ونص!!

ليش ما ورا نص ساعة عمي دز عليه هو وبنته و زوجة عمي "أخت جسار"
گالوا تعالي ويانه حنروح للزيارة بسيارات أحسن من المشي لأن فتحوا الطريق و أكو قطوعات، نصعد و وين ما ننزل نمشي..

گلت لماما و لبابا گالوا روحي، بدلت ولبست عباتي و أخذت فلوس من بابا ورحت وياهم
عبالي راح يخابروه ويجيهم و أشوفه!

كل ضني هيج..

ورحنا صعدنا سيارات لحد ما نزلونا بالعطيفية نمشي لأن ماكو طريق بعد، شوية و دك تلفون عمي.. سمعته يگله تعال نشوفك و بعد ما سمعت شحجة لأن هوسة الزوار و صوت السماعات چان عالي..

وكفنا و گال جسار ما يجي يگول وصلت ألكم و من عرفت بيكم طالعين رجعت رحت لبيت گرايبي و وياه جماعته

حزت بگلبي..ليش هو جاي علمودهم لو علمودي!
حتئ لو عرف بيهم رايحين ليش ما أنتظر!!!

بقيت ضايجة و مطنگرة لأن موقفه هذا خلاني أتأكد هو ما جاي علمودي، حسيت أنكسر خاطري و أنقخرت منه كلش، بس جزء مني يگلي حقه و معذور لأن أخته و عائلتها بالزيارة ألمن يجيكم بعد؟ و هو من النوع الخجول من هالناحية ميگدر يتواجد بمكان مايرتاح بيه، عذرته بس بقيت ضايجة.

وصلنا للكاظمية و زرنا و طلعنا نمشي لحد ما وصلنا قريب من بيتنا و رحنا لمطعم أتعشينا و رجعنا للبيت..

لگيت منه رسالة: أنا طلعت لكربلاء لأن أستحيت أجي و همه ماموجودين

- حسيت بيك..

- أي بعد شسوي

- چنت وياهم أني

- صدك تحچين!!

- أي والله، شسوي كل ضني أشوفك من يخابروك هناك

- هسه أعتب عليچ لو أعتب علئ أختي الما گالت راح نطلع