نظرات جنوبية

أحداث جديدة 1

عفتني هواي
مغوبر چن گبر متروك
صار هواي..
تعال امسح بچفك وجهي خل أنشاف..
ضايع وجهي من مگفاي!

زهرة:

رجعت أكتب ألكم من جديد أحداث سنة كاملة..
واني حايرة منين أبدي؟
و يا كلمة توصف الشعور بالضبط حتئ أكتبها؟
الكتابة صعبة تذكرني بكلشي..

بعد زواج جسار بشهرين:

سبتمبر 2023

عدت السادس وأني ماعندي طاقة أدرس و لا عندي طاقة أفتح ملزمة، كل وقتي چان نايمة لو أتابع مسلسل لو بالأنستا
رجعت للأغاني ورجعت أنام عليهن، فترة زواجه چانت موت بطيء بالنسبة إللي
ليلية أفتحهن جرح جرح، شكد ما أحاول أضمَّدهن ما يتضمَّدن!

كلشي يتضمَّد إلا جروحك يگلبي!

ليلية أتخيل وتفكيري ويييين ياخذني، هسه نايمة بحضنه هسه سهران وياها هسه هيج وهسه هيج..
التفكير بهيج أشياء يتعب!

چنت ما أبچي بس چنت أصير عصبية زيادة، لدرجة هلگد ما يحترگ گلبي أروح أغسل وجهي و أيديه و رجليه ورگبتي بمي بارد ثلج حتئ لو چانت بداية الشتا
بس لأن گلبي محترگ..

بهالأشهر هو رجع يتابعني و من أنشر يسوي لايك لستورياتي، خصوصاً من أنشر صوري!
چنت أحسه يريد يدز ويحچي ويايه بس حاير منين يبدي؟

بآخر عشرة أيام من شهر التاسع..
بيوم من أيامه..

كاعدة بغرفتي أدرس و فززني صوت أشعار تلفوني
رسالة منه!

جسار: شلونج، شخبارج
مشتاقين..

چنت واكفة! من صدمتي كعدت واني فاتحة عيوني مصدومة حيييل!
شتريد مراسلني ورا زواجك؟ وليش دزيت!!!

الرجفة أكلت روحي، صرت أفتر بالغرفة وحايرة شجاوب
أخاف محنتي تاخذني وبلحظة أحچيله كلشي
أخاف أضعف و ما أكدر أواجهه حتئ برسالة..

أتشجعت و گتبتله: بخير.

حتئ ما سألته شلونه، ردته يحس!

جاوبني: دومج يارب، شكو ماكو؟

أتحسرت واني ارجف واحجي بيني وبين نفسي: شتريد شنو جاي تتأكد إذا نسيتك لو بعدني أحبك.

گتله: سلامتك ماكو شي.

حس علئ نفسه و حس عليه شكد أسلوبي متغير وياه و ردي ثگيل، گال الظاهر أزعجتج تصبحين علئ خير.

شفتها وماجاوبت...

ما چنت ادري هالرسالة بسببها راح أتمرض..
نمت واني ابچي..

كعدت ثاني يوم الصبح أعظامي متكسرة و صوتي رايح، مصخنة وبس أكح
ماما شافتني هيج گالت بليل ورا المغرب أخذج للمضمد اليمنا بس أتريگي و شربي هالحبوب

أنطتني مسكن و براسيتول، أكلت و شربتهن و رجعت نمت
من أتمرض أصير فد نحيسة، ما أتحمل حچاية و أخلصها نايمة