نظرات جنوبية

البارت الخامس

وأعَذرني
أعلِة كُل لهفَة
أعلِة كُل رجفَة
أعلِة كُل مكَتوب منِي
مِطرز بـَ أهِواك
أشطَبني
العِشگ مَو نخِوة حَتی أنخِاك
وُلا گِلبي ضريحَ إمِام
مَن تدعِي يگُلك هَاك
أشطَبني
المِواسم تايهَة بعُمري
وخِريفك عُمرة مَا يگضِي
أشطبَني
ورايٌ همِوم
لِا حَظك وُلا حظِي .

زهـرة:

واني اشيل بمواعين الغدا سمعت عمو ابو محمود يحجي لبيبي وبابا..

ابو محمود: هو شچاه جَسار ما لگه غير هالبنية يريدها..!!

بابا: هي مو نفسها الرادوا يخطبوها لأخوه؟!

بيبي: يـا شني انوب هاي، رادوها گبل لأخوه وهسه هو يريدها وهم أكبر منه..!

زهرة: بقيت اشيل بالمواعين بس الصحون ترجف وشوية وتوكع من يدي!، حاولت اسيطر علئ نفسي وصرت اشيل بطيئ حتئ اسمع اكثر..

ابو محمود: اي هي مطلقة وعدها ولد هم، رادوها قبل لأخوه بس ماصارت وهسه جسار يريدها..لأن اجوا عليها ناس غريبين واهلها يردون يوافقون و جسار معارضهم..

بيبي: ياهو سولفلك؟

ابو محمود: ابو جسار خابرني مقهور و حجالي كلشي، الزلمة مقهور من ورا ابنه، يگله احبها واريدها..

زهرة: الرجفة بروحي بدت تزيد، و بديت احس بدوخة هلگد ما اللي سمعته صعب اتحمله!
شلت كل المواعين ورحت للمطبخ بس وجهي جان باهت، مبين عليه حجم الخسارة اللي راح اعيشها..خليت المواعين و صعدت فوك، الرجفة اللي بيه تزيد واني ماكاعد انطي اي ردة فعل! رحت لغرفتي لميتها وصفطت الفراش واني ساكتة! بدون بچي! بدون اي كلمة تطلع مني! بلحظتها خفت علئ روحي خاف يصيرلي شي لأن الرجفة تزيد واني ماكاعد افرغ عن صدمتي بشي! ..رحت لتلفوني شغلت اليوتيوب طلعت گبالي أصالة واغنيتها (جابوا سيرته)
جنت اسمع لأصالة مرات بس هالأغنية اول مرة اشوف اسمها، شغلتها وكملت تنظيف..

لأول مرة احس اكو اغنية انكتبت علمودي، و شلون صدفة بهيج يوم تطلعلي هالأغنية!!
كل كلمة بيها جانت توضف أحساسي..

زين ليش بيوم عيد ميلادي جسار؟ ليش بهاليوم انصدم بيك وبحقيقتك؟!
مرة انت تحب وحدة وياك بالكلية، ومرة بنت خالتك ومطلقة! وين تريد توصل!

بقيت افكر اني وحيرتي وگلبي اللي صاير مراية مكسورة، و الكزاز متطشر بالگاع بس ماينشاف بالعين!

للمغرب، رحت اصلي ودعيت ربي ياخذلي حقي منه..جنت جثة وتمشي عالكاع، ماحجي وي احد ولا اكو ردة فعل، علامات اليأس مبينة بوجهي وايديه الترجف ضلت ترجف طول اليوم..

ورا ما كملت صلاة لاحظت هدوء غريب عجيب ببيتنا، رحت لغرفة خواتي جانن كاعدات ومن شافني ضحكن عبالك يضمن عليه شي..بس امي ماكو، سألت عليها گالن راحت عالشارع تشتري صمون وهالسوالف..هزيت راسي ورجعت لغرفتي، فتحت التلفون و شفت معايدته اللي البارحة وحجينا، گلبي ضل يوجعني واني اتذكر كلشي..جبتها تعب بتعب وياك، وبعمري مافكرت اخونك، تاليها انصدم بيك تريد تتزوج!!