نظرات جنوبية

البارت الرابع

وهسه ما دام انتهينه.!

اسمحلي اذكرك..
خل اذكرك من بدينه ..
لمن چانت..
تهدل امتون السوالف
واحنه لسه بـ ( عــز ) حچينه
لمن چان
العتب نظره
الشوگ نظره
وحتى نار الغيرة نظره
والجريء الـ بينه چان (السانه عينه)
ارد اذكرك
من گلتلي .. هوايه احبك
انـه والـ (عباس) احبـك
گتلك ابشر
وانـه هماتينه احبك .!
چنه فقرة
لكن اتذكر وكتها
الدنيا صارت بين ادينه..
ومدة عدت
والتقينه ..
ومدة عدت
و انجرحنه
ومدري ياهو الخان بينه..
ومدة عدت
بيها حيل اتغيرينـه
واحد اعله الثاني صار يريد زله .!
ودسنـه فوگ اجروحنـه
و قصدا مشيـنه..
والتهينه ..
ولبسينه اگلوبنه اثياب الكرامه.!
واحنه نعرف
بين كل خل وخليله
إمبهـذله اثـياب الكـرامه
وعاندينـه..
والحچي يطول حبيبي..
وانت تتذكر غناوينـه وبچينـه
- وصح بعدنـه
-وصح چوينـه اگلوبنـه وغصبا جفينـه
لكن امحلفه الساعه
تگول اذا لحظه نسينه..
وانتهينـه ..
وهم اخبرك
للأسف موش انتهينه.?
لچن يبني
وحگ عينك من اغمض
ترد ذيچ ايامي كلها
وهيچ احس هسه ابتدينه..
وانـتهينــه ......

-سمر الخالصي

زهـرة:
گلت لماما: بس دقيقة لتتحركون ترئ اضيع، البس حذائي واجي ..

ماما: يلاا احنه هنا نتمشا گبالج ..

زهرة: دنكت اسوي بالقيطان بسرعة وسويتها و گمت عدلت عباتي وكاعد امشي ..

فجـأة ...ماكـو احد!!!!

اباوع يمنئ يسرئ ولا وحدة من خواتي ولا امي
بس الشرطة والحرس و اهل المحلات ..

گلبي نغزني حييل واني اتلفت يمنئ ويسرئ وماكو أثر
انــي ضعت!!!!

حسيت نفسي ضايعة
الشارع فارغ مابيه غير كم شخص و كلهم شباب
والشرطة من جهة ثانية كاعدين ..

ايديه صارت ترجف وكلبي تسارعت نبضاته حيل ..
حرت شنو اسوي!
گلت خلي ارجع لمكاننا كبال الامام الحسين عليه السلام بلكي الگاهم
واني بالطريق وكفت ..اتذكرت همه هسه بالسيارة لأن حيرجعون للبيت
اني اعرف همه مايعوفوني هنا ويرحون! بس خفت حييل
اول مرة احس اني من صدك ضايعة

امشي اني وعبايتي و دموعي متجمعة بعيني مكدرت اشوف بوضوح بسببها
شفت شرطي وكفت اريد اگله اني ضايعة بس اتراجعت! اني اخاف
ماعرف شنو احجي وارتبك حيل

ضليت افتر بالشارع روحه و جيه
والناس بيهم اللي يباوع مستغرب وبيهم اللي فهم اني ضايعة!

قريت ايات بداخلي و قريت زيارة عاشوراء نص منها بس اللي حافظته
و اتوسلت بصاحب العصر والزمان الامام المهدي (عجل الله فرجه الشريف) انو الگاهم ..

حالتي كامت تزداد و احس رجليه ماكدر اوكف عليهن ..

التفتت للضريح و گلت ياباعبدالله مايضيع اليجي يمك ..بس ساعدني الگاهم