نظرات جنوبية

البارت 10

هل تشـعر بقلـبي?
هل تشـعر بتـلكَ النـغزات الـتي تصـيبهُ
هل تشعر بي عندمـا ابكـي واشتاقَ لكَ
ام لا؟
هل يؤلمكَ قلبكَ عندما أُصيب بمكروه؟!
كمـا انـا ..
انا اشعر بكل شيءٍ يُصيبكَ واشعر بكل احساسٍ يمـُر عليـكَ ..
لطالما قلتُ لكَ ذات يوم بأنني أحبكَ كما تُحبكَ تلكَ التـي أنجبتكَ واكثر ..
لكنـكَ كالمعتـاد ..لن تصدقـني وضننتنـي شخصٌ عابر!!!

زهرة: ماعرفت شنو اكتبله رسالة ..
لأول مرة احتار واني اكتب رسالة لأقرب انسان علئ كلبي ..
جنت قبل اكتب بدون شعور وجانت رسائلي تطلع من كلبي واكتب بيها الي اريده ..

جنت اكدر اكول (حبيبي) جنت اكدر اكول (روحي)
بس هسه كلشي اتغير ..
ماادري اذا بقئ يحبني او لا
مادري اذا مسموحلي اكوله هيج او لا

اتمنيت اكله (من عمري علئ عمرك)
اتمنيت كل مرض بيه يصير بيه بس المهم هو يبقئ يتنفس وبخير حتئ لو بعيد مني ..

من بعد تفكير والف رسالة كتبتها ومسحتها
دزيت ..

زهرة💬: هلو شلونك ..
سمعت مريض ، وردت أتطمن عليك لا أكثر
سلامتك ومابيك غير العافية انشاءالله
مع السلامة ..

دزيتها بدون ماارجع اقراها ..
ورا كم دقيقة رجعت قريتها وانصدمت هاي شكاتبه
عالأقل انتضري يجاوب يلا تكولين مع السلامة
بس هو هذا الأرتباك
يخليني احجي اشياء اني ماريد احجيها ..

شفته يكتب وارتبكت اكثر ..

جسار💬: هلا بيج
الله يسلمج انشاءالله
الحمدلله علئ كل حال ..

زهرة: شفت رسائله وماجاوبت احس فشلة اجاوبه لأن كتله مع السلامة
بس اهم شي اتطمنت عليه ..

بس هم ضليت بقلق ..ردت اكله اريد اسمع صوتك بس استحيت!!

بعد مرور يومين ..

زهرة: طول هاليومين ادعيله يصير بخير و يتشافئ
لأن اموت بدونه ..

اشتاقيتله حيل وماكدرت انام بسبب تفكيري بيه
دزيتله رسالة ..

زهرة💬: هو معقولة اني اشتاقيتلك؟!💔
شنو الحب الغريب هذا ..؟؟

ماعرف شلون طلعت هيج كلمات. مني وشوكت كتبتها بس الي اعرفه هذا مو كلامي كلام كلبي!!
جنت ابجي ..ودزيتها اله ..

عبالي نايم لأن ماجاوب والوقت اتأخر ورا الـ 12 اكيد نايم لو شي ..

جاوبني وجان جوابه صادم!!!!!

جسار💬: ايييي بالحب وانا اروكض من دكتور لدكتور

زهرة: اتفاجأت من طريقة كلامه وحسيت عبالك اني الذنب باللي ديصير بيه ..
بس كلت يمكن تعبان خلي احاول اخفف عليه ولو بشي قليل ..

زهرة💬: انته اذيت نفسك بنفسك
الجگاير ماراح تنفعك بشيء راح تضرك
بس انته تريد وتحب هاي الآذية ..