نظرات جنوبية

البارت 5

ولا چَنك هَذاك أنتَ
العِرفني وسولَف الـ بيّة
وگِدر يوصَل غُمج روحيّ
ويماشينيّ أعلة فَد نيّة
ولا چَنك حَبيب الرُوح
چَنك مِنجبر بيّة!!

جسار: بس فهميني شبيج ؟
زهرة :وخررررر ، دفعته واني ابجي وصعدت ركض لغرفتي ابجي ...هذا ليش كاعد يسوي بيه هيج ..هو يكرهني لأن يتعمد يغثني ..بقيت اني ودموعي و عقلي اللي يكلي هو يكرهج مايحبج ..اللي يحب مايجرح اللي يحبه ومايضوجه، وهو مايحبني لأن يعتبرني طفلة ..
ونمت واني دموعي علئ خدي..

كعدت ثاني يوم الساعة بـ 11 غسلت وجهي ومشطت شعري ونزلت ..فتت للمطبخ وشفتهم كاعد يحضرون الغدا لأن عدنا خطار بعدهم مارايحين ..

ماما:تتريكين لو تنتظرين الغدا ؟
زهرة:لا مااريد ..

تركتهم ورحت كعدت يم بنات اقاربنه كلش حبابات وبعمري تقريباً ..ضلينا نسولف وبعدين فات جسار للأستقبال وكعد كبالي بصف امه

جسار:يابه البارحة اكو ناس زعلت عليه مدري شمالها ?!

ام جسار:ياهو زعلان منك؟

جسار: والله يمه واحد سواله زعلة وكام يبجي والعيون صارت حمر تخبل ..شمسويلهم اني ماادري ?

سويت نفسي ممنتبهه لكلامه وخليت وكمت اريد اصعد لغرفتي لأن صرت ماأطيق وجوده لأن صيح عليه ..

صعدت اول بايتين واحس احد لزم ايدي!
التفت ..جسار لازم ايدي و يباوعلي ..

زهرة: نعم؟ شتريد
جسار: بربج ابجي مرة ثانية حتئ اصير خدودج حمرة وعيونج حمر ..مثل البارحه

زهرة: 😒
جسار: هههههه فدوة للعيون ، اضحكي بعد عمج مايلوكلج الزعل ..چا ألمن عندج غمازة؟ غير تضحكين ...يلا لاتشردين وتعاي اتغدي ..

زهرة: أبتسمت و رجعت للأستقبال كعدت يمهم واكلت ..
كملت وكمت غسلت وصعدت لغرفتي تعبااانة من العرس واحس بعد اريد انام ..نمت من 3 لل 5 يلا كعدت ..

نزلت والبيت صاير هدوء فضيع بس ماما وعمتي وبيبي كاعدين ..

زهرة: لعد وين راحوا ..؟
ماما: اهل جسار سافروا للبصرة والباقين كلمن راح لبيته ..

زهرة: ضجت لأن ماودعته، وضلت بنفسي انو اشوفه ..
رجعت لغرفتي وبالي يمه .. ياترئ شوكت راح اشوفه بعد؟
ويا مناسبة تصير وتجمعني بيه ..

طلعت دفتري وضليت ارسم وبالي كُله مشغول بيه ..
كملت الرسمة بدون ماانتبه اني راسمه شنو ،لكيت نفسي راسمه بنت وولد بيناتهم شط كُلش جبير وهو اللي يخليهم مايلتقون  ..ضميت الرسمة و نزلت اكلت ورجعت نمت ..

حياتي هادئة والروتين كاعد يتكرر كل يوم بدون شيء جديد ..
مرت شهرين علئ اخر مرة شفت بيها جسار واشتياقي كاعد يزيد يوم عن يوم واتمنئ اشوفه حتئ لو صدفة ..

و بيوم رجعت من المدرسة الظهر ورحت لغرفتي ابدل واجت ماما ورايه تسألني عن الأمتحان كلعادة، وبعدين كالت ..

ماما:اكولج

زهرة:كولي ماما؟ ...

ماما: اذا خطبوج وانتي بهلعمر توافقين ؟!!

زهرة: هههههه ماما شبيج اليوم ..وعن اي خطوبة كاعد تحجين!؟ وبعدين ترئ اني صغيرة و دراستي أهم من هيج اشياء، بس ليش دتحجين هيج؟!

ماما: تعرفين هايه بنت اخو جسار !

زهرة: اي شبيها !!

ماما: اليوم خابرتني وخطبتج لـجسار ..
وكالت جسار كايللها تحجي وياي حتئ تخطبج مني ..

زهرة:انصدمت وماعرفت شنو اجاوبها ..اكتفيت بسكوتي وسويت نفسي اطلع ملابس من الكنتور ..

ماما:هاا؟ شو ماجاوبتيني ..

زهرة: ماما شنو هلحجي؟ مستحيل اترك دراستي واتزوج ..
ترئ بعدني 14 سنه عن اي زواج تحجين!!

ماما:اني ماكاعد اخذ رأيج واكولج وافقي بس ردت اشوف ردة فعلج، وترئ مستحيل انطيج الهم ودراستج أهم من كل شيء .. وعافتني وطلعت ..

زهرة:

يعني اذا هيه ماتريد تسمع رأيي شكو كالتلي و شوشت عقلي! اووووف يربي شلون اني ويه جسار ..
مستحيل اتزوج واني بهيج عمر ..مستحيل اترك دراستي!!
أني احب جسار وأريده صح، بس مااكدر اكون له زوجه وشريكة حياة ..

بدلت واتغديت وبالي مشغول بهلموضوع وياترئ ماما شنو راح تجاوب بنت اخو جسار وشلون راح تكوللها ..ضليت بقلق وحتئ مادرست و حتئ نوم ماكدرت انام ..

بقيت 4 ايام نفسيتي تعبانة ومالي خلك لكلشي حتئ دراستي هملتها وطول الوقت اني صافنة وبالي مشغول ..

شنو رأيكم ؟💜انطوني توقعاتكم للأيام الجايه شنو راح يصير بين زهرة و جسار؟ يلا خلي اشوف منو صاحب التوقع الصح 🌚..

وجداً اسفة لأن البارحه مانزلت بارت بس ظروف صارتلي وماكدرت انزل 🍁 ..

دمتم في أمان الله وحفظه ❤️