نظرات جنوبية

البارت 5

صدماتٌ تحتلني ..
تحبسُ انفاسي ..
تجعل قلبي يؤلمني ..
والندم يأكل بروحـي
هل بأستطاعتي ان اصرخ؟
تلكَ الصرخة التي لربما سجنتها في قلبي لعامين
هل يمكنني اخراجها الآن؟
من بعد كل تلكَ الجروح والكسور التي في قلبي
هل يستطيع شاعراً ان يتكلم عني؟ و يشرح للجميع بأنني مُتعبة من كل شيء بطريقتهُ الشعرية ..
هل من الممكن ان احذف مرارة الأيام التي عشتها من حياتي ..
لطالما حلمتُ ان نكون سوياً
تحت غرفةٌ واحدة
وطفلٌ يتوسطُ أحضاننا ..
لكن!!! ثم من جاءت بعد كل هذا التعب لتسكنُ قلبكَ
وتحتل فؤادكَ .. وتسمعُ صوتكَ وتستنشق رائحتكَ
جاءت بدون حب ..هي لاتُحبكَ مثلي ..
انا عاشقتكَ الوحيدة ..التي كسرتها وصدمتها اكثر من مرة ..ولاتزال تُحبـكَ ..
اي حبٌ هذا حبي لكَ؟!!

بقلمـي ...ZAHRAA_alabadei

زهرة:

مر يومين وام جسار رجعت للبصرة ..بس اني احس روحي رايحة ..

بعد مرور شهرين ...
امتحنت نهاية الكورس الثاني وطلعت راسبة بدرسين
وامتحنتهم بالدور الثاني بس رسبت!!

لأول مرة اعيد السنة ..
بالبداية بابا صار عصبي لأن اول مرة ارسب
بس بعدين اتقبلوا الموضوع
وماما ما حجت شيء لأن تدري بسبب نفسيتي رسبت!!
همه اتقبلوا الموضوع بس اني صارت بالنسبة الي صدمة جديدة ..وصار لازم اتعود كل يوم انصدم بشيء

صرت انسانة فاقدة لكلشي حتئ مشاعري ماتت
ضعفت حيل ووجهي ذبل!!!
وملامحي اختفت
لون بشرتي تحول من الأبيض للأصفر
وبأكثر من مرة خشمي يطك دم بسبب الضغط واتخربط ...
ورجفة بأيديه دائما ..

فترة تعبت بيها كلش ..
جان شهر محرم بوقتها ..

بيوم بليل كاعدة اني وماما وكالت ..

ام زهرة:باجر اخذج للطبيب اشوف شبيج
ماعاجبتني وجهج اصفر ..

زهرة: مابيه شيء

ام زهرة: لاتعاندين باجر ترحين واشوف شبيج ..

زهرة:

ثاني يوم كعدتني ماما الساعة 8
بدلت وطلعنا لعيادة قريبة من بيتنا ..

اخذتني للطبيب وطلب تحاليل لكلشي ..
سويت تحليل وطلع بيه فقر دم ودمي 8

وكام الدكتور يحجي ويوصي شنو اكل ولازم التزم بالعلاج ..واني بس اهز براسي بس بالي مو وياه

بس ماما ماارتاحت ..راحت لدكتورة العيون وهم سوت فحص لعيوني ..
وفحصت الدكتورة عيوني وكالت ..

الدكتورة: عندج قصر بالنظر ..
ليش حبيبتي انتي عيونج حلوة ليش متعبتهم
هذا كله بسبب التلفون

زهرة: صفنت بوجهه مدري شحجي
ماتدري هذا بسبب البجي الي راح يصيرله سنة!!

الدكتورة: لاتستعملين التلفون هوايه هالفترة