نظرات جنوبية

البارت 9

گالولـي مريض وكلت شعليه؟
درت وجهـي وحبسـت انفاسهـا الريـة
أكومـن ردت مـن يمهـم ومـا شالنـي رجليـه
احـس بروحـي كمـت ارجف
دمـع مـن كـل مكـان انـزف
يربـي شبيـه مابيـه ..!!
أضـن المـرض منـه انشـال وأنـدار المـرض بيـه
اضحك والفراك يگود بيـه
مـدري ليـا مذلـة ويـا اذيـة
حيلـي وهيبتـي ودمعـات العيـون
خلصن!! بس معزتـك هيـه هيـه ..

زهرة: من بعد ما احتفلنا بعيد ميلادي ..
رحت نمت ..
اتمددت و شفت تلفوني
اشعار رسالة من جسار ...
دخلت للرسالة لكيته مجاوب ع الستوري ومعايدني بيه

جسار💬: كل عام وانتي بألف خير ياربي سنة سعادة علئ كلبج ومليئة بالأفراح والأطمئنان ياربي ..

زهرة: قريتها اكثر من مرة ودموعي تنزل ..
كتبتله ..

زهرة💬: شكراً ..

لأن ماجان عندي جواب اله!!! لو اريد اجاوبه جان بجيت بجي سنتين جان صرخت!
بس ماكدر ..باقية ساكتة والوجع يمشي بكلبي وياكل بروحي وعلئ يوم يموتني ..

مر اسبوع ..
و طول هالأسبوع جسار يشوف شنو انشر ويعلق واني ماانطي ردة فعل او اجاوبه ..

بيوم نشر صورته ستوري ..جان لابس دشداشة بيضة وعكال وبيده جگارة ..
انتبهتله وجهه تعبان وعيونه ذبلانات اكثر وجواها سواد ..

بدون شعور كتبتله ..

زهرة💬: تكدر تحبني مثل ماتحب جگارتك؟!

دزيتها واحس جسمي كله يرجف وايديه ترجف حيل
و رجليه ماكدرت اوكف عليهن ..
من تفاركنا صرت من ادز الرسالة احسب الف حساب
وارجف الف رجفة بدون سبب
خوف ومشاعر مجتمعة وقلق وحيرة كلها تلتم
واهدء من اشوف حرف منه ..
حتئ لو حرف واحد راح اصير بخير

ورا دقايق جاوبني ..

جسار💬: انا صويحبي الدخان بس هو اليسليني
وتالي الليل حسره أصير وما هو اليواسيني
وكلي بيا ذنب ملجوم وصورتك لازكه بعيني
واكظي الليل هم بهم واغفه من البجي ومحد يصحيني

زهرة: اباوع للشعر ودموعي تجري!!!
ادري بيه من زمان يحب يكتب شعر ويقرا شعر هم
بس ماتوقعت يجاوبني بشعر!!
ماعرفت شنو اجاوبه ..بس بكلمة

زهرة💬: الله ..

جسار💬: اييييي
صاير اكتب هههههه

زهرة💬: حلو ..

جسار💬: لا يجيب الهم والحزن ويزيدهن هم ..

زهرة💬: صحيح

جسار💬: شلونج

زهرة💬: زينة!
وانت

جسار💬: الحمدلله

زهرة💬: تدري شنو ..

جسار💬: شنو؟

زهرة💬: جنت تكتبلي فصحة!!! هسه شعبي!

جسار💬: عندي هواي فصحة ..
بس اهوئ الشعبي ..