نظرات جنوبية

البارت 2

زهرة ..

مرت أيـام وأشهـر واني ماشايفه جسار، اشتاقيتله حيل وكل فكري وكلبي يمه ،

الئ أن بيـوم جنت كاعدة ادرس و سمعت صوته!!
كلشي بداخلي ضل يرجف ..خوف وحب واشتياق كل هايه المشاعر أتجمعت بلحظة وحدة ..

أريد انزل اشوفه بس خجلي هو المانعني ، اني اخجل اذا ابتسملي ..شلون لو سلمت عليه...

يربي أريد اشوفه ..ضليت افتر بالغرفه ،من القلق صرت اكل اضافري واحجي وي نفسي ..

اني لازم اشوفه ..اي لازم اشوفه ،شنو هسه اني اضل بس اسمع صوته وماشوفه اوووف شسوي
ماكو غير حل، من يطلع اشوفه من الشباك ..اي احسن لأن اني استحي اسلم فـ اباوع عليه من الشباك بدون ميدري احسن ..بس غير يطلع

رجعت ادرس وكل شوي اباوع للشباك ..

سمعت صوت بالكراج ،باوعت للشباك ..جسار يحجي ويه بابا وعمو ويضحكون ..يربي هسه ارتاح گلبـي ،
حسيت عيوني تكحلت بشوفتـه 
اباوعله وهو يضحك شكد حلو ، عنده شامة جوه شفته محليته أكثر ..يبوو علئ كلبي شكد يحبك يـ جسار
شهلضحكه ..شنو هلعيون الساحرتني ..

ضليت اتغزل بيه الئ ان طلعوا كلهم برا البيت ..

فزيت علئ صوت ماما وهي تحجي ورايه

الأم: شتسوين ?
زهرة: ولاشي بس جنت ادرس وكملت
الأم:يلا تعالي حتئ امتحنج
زهرة:اجيت ..

رحت الـماما امتحنتني و رحت نمت ..

قبل لا أنام اتخـيل جسار وأتخيل هو يحبني وأحبه ونعيش حياة سعيدة .. جنت مراهقة بس جان حبي مو حب مراهقة ابد
حبيته حب عالفطرة، حب طفولي ، نقي،مابيه اي شوائب ..

ولا احد يدري بحبي لـ جسار ..لدرجه اخجل احجي بيه وي نفسي ..

كبرت وكبر هذه الحب بداخلي ، وصار عمري 14

بهالفترة صارت خطوبة ابن عمي ..
والكل اجه حتئ يحظر الخطبة، ومن بينهم جسار
اتعودت أشوفـه بكل مناسبة ولهذا السبب صرت احب المناسبات اللي تصير ❤️ ..

بيـوم الخطوبـة

اتحظرت ولبست بنطرون نيلـي و قميص ابيض و سترة لون ازرق وبيها زخرفه ..و شال لـون نيلـي غامق
نزلت من الدرج وصارت عيني بعين جسار ..شافني وابتسم

جان لابس دشداشه لون نيلي و لاف الشماغ علئ راسه بلون صحراوي ...هههه للحظة حسيت احنه متفقين شنو نلبس ،

فتت من يمـه وأحس ريتي أنملـت من عطـره ..
هذا راح يموتني يعني ليش هلكـد حلـو 💔 ،

رحنه للخطبـة و عقدلهم الشيخ و رجعنه ، وعلئ طول الطريق الولد يركصون واحنه نضحك عليهم ..
بس اللي عجبني جسار من يركص ..حتئ وهو يركص يجنن
صرت اغار من كم بنية جانوا كاعدات يمي اسمعهم يحجون بيناتهم ما جنت اعرفهم منو لان اقارب اهلي

:لج باعـي هذا شلون يركص فدوة
: اي والله يجنن يهنيـال اهلـه بيه

اسمعهم وبداخلي متت من القهـر ..
وكالعادة لازم أسكُت لأن بعمري ممسويتها واتجاوزت عالغير
وضميت القهر بكلبي و  احس عيوني صارت تحركني لأن اريد ابچي ..كل شوي الدمعة تصير بطرف عيني وامسحها خاف ينتبهون ...

رجعنا للبيت وهم اجو ناس اقاربنه ...وبقت ناس تجي وناس تروح .. وهوسه و صوت الأغاني عالي حيل وكلهم يركصون وفرحانين ..بس اني بداخلي غصة!! كل حقد العالم صار بگلبي للبنية اللي حجت بـ جسار ..
حسيتها تحجي عن شيء من ممتلكاتي وممنوع تحجي عنها ..
أتمنيت لـو اني عندي الجرئة حتئ إرزلها وامنعها تحجي عنه،
بس ماعندي قوة وجرئة حتئ احجي ..

صار وقت الآذان و طفوا الأغاني ..وناس كامت تصلي
كعد الكل بالأستقبال، حتئ جسـار ..

جنت احجي ويه بنت عمتي ومامنتبهه لأحد ..
درت وجهي ولكيت جسار صافن عليه!!
هذا شبيه صافن بوجهي!   ،  صرت احرك ايدي بس حتئ يدور وجهه بس ما انتبه ..سويت نفسي اعدل بحجابي وهو ابتسم بسرعه ودار وجهه ..
عزاا هذا ليش صفن بوجهي 😶
معقولة يحبني؟  أو معجب بيه؟ لا لا مااعتقد ..مستحيل،

وره شويه ماما كعدت يمه لأن هو يحب ماما كلش وبيناتهم ميانـه ودائماً من يجي يسولف ويضحك وياهه ..

اني جنت قريبة منهم فـ أسمع شيحجون ..

ضلوا يحجون ويضحكون الئ أن ماما گالت لجسار :

ماما: اي شوكت تزوج حتئ نفرح بيك ?
جسار: اذا عندج مرة زوجيني 😂
ماما: اي اشوفلك ليش لا
جسار: ليش ما تنطيني وحدة من بناتج ؟!

حجاهـا بضحك وباوعلي ورفع حاجبه بنظرة سريعه ..حسيت ايدي صارت ترجف وارتبكت، بس حاولت انو اني ماسمعت شنو گال ..

جاوبته ماما ........يتبع

شنو رأيكم بالبارت ❤️

طبعاً اختصرت احداث سنه لأن بهالسنه ماصار شيء مهم بحياة زهـرة  ..والأهم من هذا كُلـه هي علاقتها شلون راح تبدأ بجسار !! وشنو راح يكون مصير حبها لـ جسار ..
و هل ياتـرئ هـو يبادلهـا  المشـاعر أم لا ..

دُمتـم فـي أمـان الله وحفظِـه 🍁