نظرات جنوبية

البارت 8

‏لو جئتَني لوجدتَني
‏سحبًا تراكمَ دمعُها
‏ويكادُ يهطلُ في ثنايا
‏أحرفي ..
‏لوْ جئتَني لوَجدتَني
‏يَعْقُوبَ أعماه الفراقُ
‏وَلَيْسَ غيرُك
‏يوسُفي..

مرت الأيام وحبنه يكثر كل يوم وصرنا 24 ساعة نحجي وي بعض، بالنهار رسائل وبالليل اتصال ونخلصها اكثر شيء ضحك لأن هو يضحك عليه لأن اخجل احجي و مخليته وحده يسولف واني بس اسمع ..

الئ أن بيوم كاعدين نحجي اتصال وگلتله:

زهرة: أكولك!

جسار: هاا حبيبي كولي ؟

زهرة: بعد يومين دورة السنة مالت جدو وراح ياخذون كوستر أعتقد حتئ يرحون للنجف!!

جسار: ايي وبعد؟!

زهرة: شنو بعد، اني بس ردت أكولك!

جسار: ليش أحس تردين تشوفيني!!

زهرة:هاا، شنوو، لا لا مو هيج افتهمت غلط ..
ارتبكت وماعرفت شنو احجي!

جسار:هههه اني هم راح اجي حتئ اشوفج ..

زهرة:صدُك تحجي ?!

جسار:اي والله، هم لأن عيب لأزم نجي وهم أشوفج، مشتاقلج صار هواي مشايفج ..

زهرة:

ضلينا نحجي وبعدين سديته منه ورحت نمت ..
و وره يومين سووا دورة السنه لجدي ..واجه جسار ..
دخل جسار وسلم عليهم واني جنت واكفه ورا بالأخير مايشوفني ..ألتفت وشافني وضحك وعيونه تلمع  ..

جسار: شلونج (وهو يحاول يخفي ضحكته)

زهرة: الحمدلله زينة ( واحاول ماابتسم وخدودي احس بيهم نار) تركته وطلعت من الاستقبال ..وكلبي يدك وكل جسمي يرجف ..

خلصو من الثواب والتمت الناس الاقارب والعمام كلها اجت بليل حتئ نطلع باجر للنجف ..وبعدين اتعشينا ورحنا كلنا نمنا ..

كعدتني ماما الساعة 3 الفجر حتئ نصلي ونطلع ..
صليت وكملت ورحت بدلت، لبست بنطرون أسود و قميص  اسود وشال اسود ..و جاكيت اسود دافي لأن بادرة جانت حيل ..كملنا وصعدنا بالسيارة والدنيا بعدها ظلمة ..رحت كعدت يم بنت عمي علئ جهة الشباك ..وماما واخواتي يم نسوان عمامي ..باوعت جسار وين؟ صعد جسار و كعد بالبداية لأن دائماً الرجال لازم ليكدام ..

نمت بدون مااحس لأن مانايمه قليل ..بس حسيت علئ بنت عمي وهي تكوم من مكانها وماعرف بعد منو كعد يمي لأن رجعت نمت  ..فزيت علئ صوت جسار وهو يضحك ويكلهم

جسار: لاخطية خلوها نايمه ..

بنت عمي: اذا ضايقتك تعال نبدل المكان ..

جسار: لا عادي ..

زهرة: فزيت واشوف نفسي نايمه علئ جتف جسار ،يبووو شنو هلفشلة ..شلون راح اكدر اكعد اصلاً استحي ..
فتحت عيوني وباوعتله ..لحيته محليته اكثر وتفاحة ادم مبينه اكثر ..وعنده شامه ثانية بركبته ..

صفنت عليه بدون ميدري لأن جنت مخليه راسي علئ جتفه ..
التفت وشافني كاعدة ..ابتسم وكال

جسار: الحلو صافن بوجهي ?!

زهرة: استحيت وغمضت عيوني ..من الخجل

جسار: هههه اي عيني شو ساكتة وين لسانج ?! ولو انتي لسان بس بالرسائل ...

زهرة: باوعتله وماعاجبني ..😑

جسار: هههه، مشتاقلج

زهرة: ابتسمت و باوعت علئ عيونه، ضلينا خمس دقائق واحنه واحد يباوع للثاني ومانحجي ..بعدين جر تنهيدة طويلة مافهمت شيقصد بيها ودار وجهه للجهة الثانية ..

زهرة: بردانة ..

جسار: لحظة ..(نزع سترته وانطانياهه وخلاها عليه)

زهرة: لا خاف انته تبرد ..
أبتسم وكال

جسار: تعاي رجعي نامي علئ جتفي واني ماابرد ..

زهرة:خليت راسي علئ جتفه واني كل شوي اشتم عطره بدون ميدري ..بعدين اخد ايدي بأيده ..وبقت اصابعنا متشابكة ..

جسار:ايدج باردة حيل ..

زهرة: اي يمكن لأن الجو بارد ..

جسار: ههههه باعي خدودج شلون صارن حمر، مدري من البرد لو من الخجل مالتج الذابحني ..

زهرة:ابتسمت وكتله. .أوخر راسي لإن خاف تعبتك ..

جسار: لا ابد ماتعبتيني بالعكس مرتاح وانتي يمي ..

زهرة: طبعاً نحجي بهدوء والكل نايم وضوء الفجر صار يطلع شويه ..وخرت راسي وباوعت عالشباك ..

جسار:شكد عنودية رجعي راسج يلا ..

زهرة:بس..

جسار:قاطعني وهو يخلي راسي علئ جتفه وايده بأيدي ..
وبعدين سألني  ..

جسار:تحبيني ?!

زهرة: ابتسمت وهزيت راسي ..

جسار: ههههه شكد خجولة ياالله،

زهرة:عيونك حلوات ..ماعرف من وين اجتني الجرأة بس طلعت مني بدون ماادري ..

جسار: جمالي لاشيء كدام عيونج..، عيونج بس نظراتها تجنن وهاا من غير اللمعة اللي تصير بيهن من تشوفيني،
تدرين احسج بنتي لأن من اوكف يمج يكولون هاي بنتك مو حبيبتك ..هههه

زهرة: يعني هسه اني مو حلوة لأن قزمة؟! 

جسار: يابه انا كلت هيج ..اصلاً الكصر احلئ من الطول ..
انوب احب وحدة طويلة شني زرافة ?! الكصيرة احلئ بهواي وباوعلي وضحك ..

زهرة: عزاا جسار صوتك ليسمعونا ..

جسار: اي كلش هسه انا مهتملهم ..لاتخليني اكعدهم واكولهم احب بتكم ..، ومرة ثانية ديربالج تكولين عزاا افتهمتي ?!

زهرة: ليش بله مااكول!!

جسار: بكيفي ..ويلا نامي شكد تحجين ..

زهرة: ترئ انته كاعد تحجي ويايه مو اني ..

جسار: عيني يالبغدادية نامي لا ابتلي بيج ..

زهرة:

ضحكت ونمت ..

شنو رأيكم 💜لاتنسون التصويت ..

دُمتم فـي أمان الله وحفظـه ..🌻